Player dang tena an la tih theih ngai loh, Sancho’an Bundesliga record thar a siam!

Borussia Dortmund in RB Leipzig an hmachhawn tum khan Jadon Sancho chuan Bundesliga history a siam a ni.

Inrinni khan Dortmund chuan RB Leipzig an tlawh a, mahse, vanduaithlak takin 4-1 lai maiin Leipzig lakah an tlawm hlauh mai.

Advertisements

Edin Terzic leh a naute hian RB Leipzig hi Red Bull Arena lamah an tlawh a, Sancho chuan Dortmund tana goal awmchhun hi a khung nghe nghe.

Sancho hian minute 20 naah goal mawi takin a khung a, kha a goal khung kha January thlaa loan-a Dortmund a zawm leh hnua goal 3 a khung na chiah a ni.

Amaherawhchu, RB Leipzig lam chuan goal 4 an rawn khung belh a, point 3 hlu tak hlawhchhuakin table-ah palina dinhmun-ah an la awm chhunzawm.

Dortmund lam hi a tlawm zawkah tang mahse, Jadon Sancho chuan Bundesliga history thar a siam a ni.

Tunah hian Germany club inelna sang ber Bundesliga-ah goal 40 a khung tling ve tawh a, Bundesliga lama English player khel tawh zawng zang zinga goal khung hnem ber a ni.

Jadon Sancho hian Arsenal winger hlui Tony Woodcock a khum a, ani hi FC Koln leh Fortune Koln tan a rawn che tha viau mai.

Jadon Sancho’an record thar a siam chungchang hi social media lamah pawh hmuh tur a tam hle. Amah ngei pawhin history thar a siam thu hi social media lamah a post nghe nghe.

Mahse, tuna a lan dan chuan Sancho hian a record neih hi a hum rei vak dawn lo niin a lang, a chhan chu Bundesliga lama season khatna hmang mek Harry Kane chuan Bundesliga goal 35 a khung tling der tawh a ni.

Harry Kane hian summer transfer hnuhnung berah khan Tottenham atangin £86 million lai maiin German club lian hi a zawm a, goal khung lamah a duailo hle. Sancho’an Bundeslig record a neih hi a khum thuai a rinawm.

Scroll to Top