Daily Mail in a tarlan danin Manchester City chuan Manchester United leh Real Madrid target Everton defender Jarrad Brantwaite chu lak luh an tum ve dawn niin reports in a tarlang.
Brantwaite hi tunhnai lawk atangin Toffees player pawimawh tak pakhat a rawn ni chho a. Carlisle United atangin Everton hi a zawm a, Everton a zawm hma pawhin club hrang hrangin lak luh an lo tum tawh a ni. Amaherawhchu, kum 2019 khan a vawikhatna atan Everton lamah professional contract a sign ve ta a ni.
Hemi hnu hian Brantwaite chuan loan in PSV Eindhoven a zawm a, KNVB Cup nomawi a chawi pui nghe nghe. Everton lama a rawn kir leh meuh chuan first team lamah a kaichho nghal a, tun season khelh mekah an player pawimawh tak pakhat a ni mek. Match 31 an khelh tawh atangin clean sheet vawi 10 lai annei tling mek bawk.
December thla laihawl vel atang khan Toffees lam hian hnehna an chang leh tawh lova, tunah hian table-ah 16 na dinhmun an hauh mek. An player man atan £60 million lai mai an chhiar niin an tarlang.
A hmain Manchester United leh Real Madrid lam chuan Brantwaite hi lak luh an lo duh tawh a, tunah hian Man City lamin an chuhpui ve dawn niin a lang. Tun international break-ah khan England first team tana koh a ni ve bawk. Belgium an hmachhawn hunah kum 21 a upa Brantwaite hian England tana a game hmasa ber tur a khelh ngei a rinawm.
Toffees lamah hian 2026-27 season thleng daih contract a nei mek a, tuna a hlutna Transfermarkt in a tarlan hi €30milion vel a ni.
