Liverpool chuan season thar lo awm turah manager thar an mamawh dawn a, manager tur leh player thar thlithlai turin an scouts te an tir lut niin report in a tarlang.
Kan hriat angin January thla khan Klopp chuan tun season khelh lai a zawh hunah club a chhuahsan tur thu a sawi anih kha, Reds hian 2023/24 season khelh mek a zawh hunah an manager Jurgen Klopp hi an chan dawn a ni.
Hetia a chhuah tur thu a puan hnu hian Liverpool leh manager hrang hrang Xabi Alonso, Roberto De Zerbi, Julian Nagelsmann leh Ange Postecoglou te nen sawi zawm ve nghal anni.
Daily Mail lamin an report angin Liverpool lam hian an sout te Portuguese club Sporting Lisbon lamah an tir lut niin a tarlang a. Sporting Manager Ruben Amorim hi Liverpool nena sawi zawm ve a ni.
Liverpool scout te hian Sporting match khelh te an en niin an tarlang a, kar hmasa lama Benfica an hnehna match pawh kha Liverpool scout te chuan an en ve niin an tarlang bawk.
Scout te hian Amorim an thlithlai mai bakah Sporting defender Ousmane Diamande pawh an thlithlai tel niin an tarlang a, ani pawh hi engtikniah emaw chuan an la luh ngei a rinawm.
Ivorian star Diamande hian 2023 January transfer lai khan Midtjylland atangin Portuguese club hi a zawm a, ala che tha tluang zel a ni. A hlut zawng hi £70 million vel anih rin a ni.
Liverpool hian Sporting Lisbon manager leh defender hi an la lut rual thei ang em? Thlir leh phawt ang aw.
