‘Game harsa tak pahnih a ni ngei ang’- Bayern Munich superstar Neuer

Bayern Munich goalkeeper Manuel Neuer chuan UEFA Champions League quarter finals-a an hmachhawn tur Arsenal chungchang a sawi a, an game khelh tur hi game harsa tak anih ngei a ring.

Team pahnih te hian April ni 9 khian quarter finals first leg an khel dawn a, Emirates stadium-ah Bayern Munich lamin an tlawh hmasa dawn a ni. Second leg hi April ni 16-ah khelh leh a ni ang.

Advertisements

Kum 2017 khan Arsenal leh Bayern Munich te hi Champions League round of 16 ah khan an lo intum tawh a, kha tihlai khan Neuer pawh hi a khel nghe nghe. Bayern Munich lam chuan home leh away-ah 5-1 ve vein hnehna an chang a, aggregate 10-2 lai maiin German club lam hi an tlang ta zawk a ni.

Amaherawhchu, Neuer chuan tuna Arsenal hi chu a danglam hle tawh niin a ngai a, Mikel Arteta hnuaiah an che tha hle. Premiere League khelh mekah Liverpool leh Man City pelin hmahruaitu anni mek a, Premiere League match 10 chiah khelh tur a awm tawh bawk.

“Arsenal hi team chak tak anni, an spirit a tha a, tunah hian Premiere League-ah a chung ber anni mek.” tiin Neuer chuan Daily AFC a hrlh.

Arsenal hian quarter finals an luh theihna turin Porto an hmachhawn a, aggregate-ah 1-1 a an indraw avangin penalty pet a ni, 4-2 in Arsenal lamin hnehna an chang. Bayern Munich pawhin Lazio hmachhawn vein 3-1 aggregate in an tlang ve bawk.

Neuer chuan game 2 an khelh tur hi game harsa tak anih tur thu a sawi.

“Game harsa tak pahnih a ni ngei ang, kan theihna zawng zawng kan pho chhuah a ngai dawn a, mahse, a phurawm hlein ka hria, Arsenal kan hmachhawn tur hi kan hlim a, phur takin kan khel thei dawn a ni.” tiin a sawi belh bawk.

Tun season khelh mekah duh angin Bayern Munich lam an che lutuk lova, kum 12 hnuah Bundesliga nomawi an chan ve dawn niin a lang. Alonso enkawl Bayer Leverkusen lam an che tha hle.

Scroll to Top