Mauricio Pochettino chuan tun season Premiere League khelh mekah Chelsea lam a chet that pui lo hle a, amaherawhchu, cup inelnaah erawh beisei aiin an thleng sang thei hle.
Argentine manager hian Chelsea chu EFL Cup final a luh pui a, Liverpool lakah an tlawm anih kha. FA Cup lamah pawh semi final lut leh tawhin, Manchester City an hmachhawn dawn a ni.
Kan hma lawkah summer transfer window a inhawng leh dawn a, Chelsea lam chu Jamal Musiala la lut thei turin an inpeih leh tawh niin report in a tarlang a, hetihlai hian Milos Kerkez pawh lak luh an duh tho niin an tarlang.
Sport Bild in an tarlan danin Chelsea chuan tun summer transfer lo awm turah Jamal Musiala man atan sum tam tak insen an huam niin a tarlang.
German attacking midfielder Musiala’an Bayern Munich lama contract a neih hi kum 2026-ah a zo ve dawn a. Bayern Munich lam chuan la awm zel se tih an duh laiin, Musiala chuan contract thar a hnawl thu an tarlang.
Hei hi Chelsea chuan hun remchangah la in, kum 21 a upa hi Stamford Bridge lamah lak luh an tum ve ta a ni. Tun season khelh mekah match 31 inlan tawhin goal 12 a khung mai bakah assist vawi 7 a nei tling mek.
Musiala hi Chelsea Stamford Bridge rank atanga chawr chhuak niin, kum 2019 khan Chelsea chhuahsanin Bundelsiga Champion Bayern Munich hi a zawm ta a ni, Chelsea first team tan a khel hman lo chiah chiah.
Bayern Munich lam hian an chelh thei dawn nge, a club hlui lamah a kir leh dawn tih ala chiang lova, thlir zel phawt ang.
