Nizan khan Anfield-ah Premiere League club lian pahnih Liverpool leh Manchester City te inhmachhawnin, John Stones leh Mac Allister te goal khat hmangin an indraw a nih kha.
Liverpool lam hian Europa League an khelh tuma hliam tuar Ibrahima Konate an luh tir thei lova, Jarell Quansah’an inkhelh bul a tan. Hemi chungchang hi Carragher chuan sawiin, Van Dijk hian defence line a control hneh hle niin a sawi a. Kum 21 leka upa Quansah pawh amah avangin a che tha niin a sawi tel bawk.
“Haaland hi khawvel centre forward tha ber a ni a, mahse, centre back angin Van Dijk alo awm a, chu chu a hmachhawn a ni. Erling Haaland striker anih aiin Van Dijk hi centre back ang zawngin a tha zawk tih hi ka ngaihtuah.”
“Ti hian han ngaihtuah la, khawvel centre forward tha ber leh khawvel centre back tha ber an inhmachhawn a, Van Dijk a chungnung zawk a ni” tiin Carragher chuan a sawi.
Nizan inkhelhah khan Pep Guardiola naute kha first half-ah an che tha deuh zawk ti ila kan sawi sual awm love, Kevin De Bruyne corner fing tak hmangin minute 23 naah John Stones chuan goal a khung anih kha.
Second half-ah Ederson chuan Nunez lakah a foul hlauh mai a, Mac Allister chuan penalty petin draw na goal a khung a, hun tawp thlengin goal dang a luh belh tawh lo.
Team pahnih te an indraw avangin Arsenal team te chu table chung ber an awm a, Liverpool nen point inang hmuin goal difference-ah an san zawk vang a ni. Pathumnaah Man City awm vein, point khat chiahin 1 na leh 2 na hi an phak lo.
Tun season Premiere League meuh zawng Top 3 ni mek te an che tha hle a, an tan vawikhat chak loh pawh a pawi thui viau thei. Title race a hmuhnawm chho zel dawn niin a lang.
