Arsenal player hlui Paul Merson chuan May ni 12, Pathiannia an hmachhawn tur Manchester United game chu an game khelh tur la awma game harsa ber tur anih thu a sawi chhuak.
Kan hriat angin Arsenal chuan North London lama an elpui Tottenham Hotspur chu an hneh a, hnehna an chan hnu hian tun season khelh mek Premiere League lama an dinhmun chu a tha chho viau mai.
Season hmasa lamah khan an champion teuh hle a, mahse, an game hnuhnung lamah an ti sual hlauh anih kha, tun season khelh mekah hian Premiere League hmahruaitu an la ni a, an game khelh tur pathumah hnehna an chan theih vek a pawimawh hle ang.
Sky Sports studio lamah Paul Merson chuan Tottenham Hotspur an hmachhawnna game kha game harsa tak a ni a, mahse, chu aia harsa leh tur chu Old Trafford-a Manchester United an hmachhawn leh tur anih thu a sawi.
“Spurs an hmachhawnna game kha game harsa-ah ka ngai lova, mahse, Manchester United an hmachhawn leh tur hi game harsa ber anih ka ring bur.” tiin Pual Merson chuan a sawi.
“Tun dinhmunah chuan an la che tha viau a, Premiere League lama an dinhmun pawh a tha viau mai. Mahse, an game khelh tur la awmah Manchester United hmachhawn chu a awlsam dawn lo hle a ni.” tiin a sawi tel bawk.
Arsenal hian Tottenham an hmachhawn hma lawk khan Chelsea chu 5-0 lai maiin an lo hneh tawh a, Tottenham chu 3-2 in an hneh leh bawk. Tunah hian table-ah hmahruaitu anni mek a, Man City aiin point khatin an sang a, City erawh game khatin an khel tlem zawk thung.
Tun season khelh mekah Premiere League match 3 khelh tur an la nei a, Bournemouth, Manchester United lah Everton te an hmachhawn dawn a, hnehna an chan theih ngei a rinawm a, hetihlai hian Manchester City lamin an game khelh tur 4-ah hnehna an chan vek erawh chuan Arsenal in nomawi an beiseina a thlawn leh dawn a ni. Tunge champion ta ang le thlir zel phawt ang.
