Manchester United leh Brazilian midfielder Casemiro chuan Argentina captain Lionel Messi a fak hle.
Casemiro chuan, “Pele leh Maradona te inkhel ka hmu hman lova, amaherawhchu kan chhuana (generation) player ropui ber pathum Messi, Cristiano leh Neymar te inkhel ka hmu hman thung” tiin Placar in an kawmna ah a sawichhuak.
“Messi hian hun bi pawimawh tak a siam a, Barcelona leh Argentina tana inelna rilru pu reng mi a ni. Football hmangaihtu chuan Messi an hmangaih ang. A inkhel ka hmu thei leh ka hmachhawn thei hi ka tan chuan hlimna a ni a, ani chungchang hi chu sawi thui vak a ngai lo, ngaihsan tawp mai lo chu” tiin Casemiro chuan Messi a dah san zia a sawi bawk.
Real Madrid midfielder hlui hian nikum nipui bazar lai khan £60 million in Manchester United a zawm a, kum 30 a upa hian Premier League-a a season hmasa berah Red Devils chu Carabao Cup chawipuiin league ah pathumna a nihpui bawk.
Casemiro hian 2022 World Cup atanga Brazil an tlâk hnuin thla khat chhung inkhel a en loh thu a sawi a, football history a match hmuhnawm ber te zînga mi Argentina leh France te final a an inhmachhawn pawh kha a en lo!
Casemiro chuan,” Dik taka sawi chuan final pawh ka en lo. Kan tlâk hnu khan thlakhat chhung inkhel ka en lova, TV pawh ka chhuah ngai hek lo. Kan tla kha a na êm a ni.”
“Ka thian tha ber te zînga mi Licha (Lisandro Martinez) kha champion team ah a tel a, zahna leh duhsakna nen lawmpuina thu ka thawn. Lawmpuina hi ka thiante zîngah phû an awm a nih chuan chu chu Lisandro ngei hi a ni ang” a ti.
