Khawvel infiamnaah chuan Football hi a ropui ber a, infiamna zawng zawnga entu ngah ber a ni bawk. Mipa ten ropui takin football an lo khel thin tawh a, player ropui tamtak an lo chhuak tawh bawk.
Tun tumah erawh hmeichhe footballer ropui 5 te kan rawn thailang ve leh dawn a ni.
5 Homare Sawa (Japanese female footballer)
Homare Sawa hming lam rik loh chuan Asian Women’s Football hi a sawi theih loh maithei.
Homare Sawa hi Japanese female footballer niin attacking midfielder-ah a khel a, kum 1991 khan kum 12 a upa chauh niin senior game hmasa ber a khel a ni. Kum 2011 khan a vawikhatna atan leh an chawi awm chhun ni turin Japan Women chu World Cup nomawi a chawi pui a ni. Japan hi Asian ram hrang hrang atanga World Cup nomawi chawi thei awmchhun anni bawk.
Homare Sawa hi a chawl mai lova, kum 2012 khan a ram Japan chu a vawikhatna atan Olympic finals a khelh pui a ni, mahse, pahnihna dinhmun chauh an hauh thei thung.
Kum thum hnuah amah leh a teammates te chuan World Cup final an khel leh a, runners up anni.
Homare Sawa leh Brazil star Formiga hian football match inlan tam ber record an nei a, kum 2015 World Cup ah khan Sawa hian record thar a siam a, mahse, kum 2019 khan Formiga’in a rawn nih rual pui.
Sawa hi a mimal ang zawng pawhin hlawhtlinna a chang tam ang reng a, award hrang hrang a dawng nual, FIFA World Player of the Year, Golden Ball leh Golden Shoe te pawh a dawng tawh a ni. Japan tan match 205 ah inlanin goal 83 lai a khung.
4 Abby Wambach (American female footballer)
Abby hi Canada star Christine Sinclair’in kum 2020 January thla-a a khum hma kha chuan mipa leh hmeichhe footballer zinga goal khung tam ber a ni, ram tan goal 184 lai mai a khung tling.
Abby Wambach hian US Soccer Player of te Year vawi 6 lai a dawng thei a, hei hi record a ni.
Wambach hi 2004 Athens leh 2012 London Olympic Games-ah khan gold medal winning team-ah a tel ve a. 2004 Athens Olympic ah khan Minute zawh dawn tepah a lu hmangin goal a khung a, US chuan Brazil chu an hneh ta a ni.
US in kum 2015 World Cup nomawi an chawi tumah pawh khan a tel a, kum 2012 khan FIFA Women’s Player of the Year award a dawng nghe nghe. FIFA Women’s World Cup-ah goal khung tam ber pahnihna dinhmun a hauh a ni, goal 14 a khung.
3 Birgit Prinz (German female footballer)
Birgit Prinz i FIFA World cup goal khung tam lamah pahnihna dinhmun a hauh ve a ni, goal 14 a khung.
A ram Germany tan match 214 a inlan atangin goal 128 lai a khung thei bawk. Kum 17 a upa chauh a nih laiin, World Cup final a khel a, World Cup khel thei naupang ber a ni bawk.
Birgit Prinz hian UEFA Women’s European Championships nomawi 4, World Cup nomawi 2 (2003 leh 2007 ah a zawnin a chawi bawk) leh Olympic Bronzes medal thahnem tak a dawng bawk a ni.
FIFA Women’s Player of the Year award vawi 3 a dawng a, tunah hian TSG 1889 Hoffeinhem team-ah mipa leh hmeichhia tan sports psychologist a ni mek.
2 Mia Hamm (American female footballer)
Mia Hamm hi hmeichhe footballer atang mipa team a khel awmchhun a ni, Junior high school-ah mipa team tan alo khel tawh.
Hamm hian match 276 a khelh atang goal 158 a khung a, kum 2001 leh 2002 khan FIFA Women’s Player of the Year atan thlan tlin a ni. Kum 1998 leh 1999 khan ESPY, Female Athlete of the Year award hlan a ni bawk. Kum 2004 khan Pele’an hmeichhe hming pahnih a sawi zinga pakhat a ni, ‘FIFA’s Best 125 players award’ a dawng. Hei mai a ni lo, hmeichhe footballer atanga ‘World Football Hall of Fame’ ni hmasa ber a ni.
1 Marta (Brazilian female footballer)
Marta hi hmeichhe footballer taima tak mai a ni a, football khawvelah sulhnu a nei ropui ang reng.
Marta Vieira da Silva hi World Cup bikah mipa emaw hmeichhe footballer zinga goal khung tam ber a ni mek, goal 17 lai a khung thei a ni.
Marta hian a zawnin vawi 5 lai mai ‘FIFA Female World Player of the Year’ award a dawng thei a. Engkimah chawimawina dawng mahse, a cabinet-ah erawh international trophy a awm ve tlat lo.
Source SK