2021 summer transfer window hawn mekah hian player tha tamtak lut leh chhuak an awm leh nual dawn a, club thenkhatte pawhin an squad thuam that an tum nasa hle. Player thenkhatte chu an man a to em em a, thenkhatte erawh free transfer in an chhuak ve bawk.
Tun tumah hian Football history bikah combined transfer fee tam zual player 5 te kan rawn tarlang ve leh dawn a ni.
A hnuaiah hian Transfermarkt in a tarlan danin kan rawn tarlang ve leh dawn a ni.
5. Angel Di Maria – €179 million
Angel Di Maria hi a generation-ah chuan player tha tak pakhat a ni, club hrang hrangah khel kual ve tawhin a khelhna apiangah a che tha ve zel a ni. Amaherawh chu Manchester United lama a khelh tum kha chuan duh angin a che tha lem lo hle.
Mahse, club leh ram tan a che tha chho zel a ni. Season thar lo awm turah hian a che tha leh thei mai ang em. Club hrang hrangah a khel kual tama, chung club tena an leina man zawng zawng belh khawm chu Euro maktaduai 179 lai a tling.
4. Alvaro Morata – €189 million
Alvaro Morata hi player tha tak tia han sawi tur chu ni lo mahse, goal hmaah erawh talent a nei tha ang reng hle, a lan danah European top club te hian lak luh an duh reng a ni.
Chelsea lama a khelh lai khan duh angin a che tha lo, Real Madrid, Atletico Madrid leh Juventus tan a khel tawh a, heta an lak luhna man zawng zawng belh khawm chu Euro maktaduai 189 lai a tling.
3. Romelu Lukaku – €212.5 million
Romelu Lukaku hian CHelsea a zawm a nih vaih chuan, khawvel player man belhkhawm a man to ber ani thei dawn, tunah hian a club hlui Chelsea chuan Stamford Bridge lamah lak luh an tum mek niin thuthang a tam hle.
Belgian star Romelu Lukaku hi tunlai khawvel striker tha ber pakhat a ni mek. Kum 2019 khan Manchester United atang Inter Milan a zawm a, beisei lo deuhin a che tha hle. Lukaku man belh khawm zawng zawng hi Euro maktaduai 212.12 lai a tling.
2. Cristiano Ronaldo – €230 million
Football history-a player tha ber pakhat a ni, C Ronaldo transfer fee belhkhawm zawng zawng chu Euro maktaduai 230 million a tling tawh. Manchester United leh Real Madrid lama a khelh chhung pawh khan a che tha hle a, tunah Juventus tan pawh goal khung lamah a duailo hle.
1. Neymar – €310.2 million
Neymar hi kum 2017 atang tawh khan khawvel player man to ber ani mek. A man zawng zawng belh khawm chu Euro Maktaduai 310.2 lai a tling a ni.
Source 90Min