Fofana leh Maddison te hi zawrh lai anni lo – Rodgers

Leicester City manager Brendan Rodgers chuan an player kawllai pahnih Wesley Fofana leh James Maddison te chu zawrh lai an nih loh thu a sawi chiang.

Tun nipui transfer bazar kal mek ah Leicester lam hian an captain Kasper Schmeichel chu Ligue 1 club Nice lamah an chan a, player lakluh thar erawh an la neilo thung.

Report tarlan dan in James Maddison chu Newcastle United lam in an hel mek a, Wesley Fofana pawh Chelsea lam in £65 million bawr vel in an dawr bawk. Heng player pahnih te hi September ni 1 hma ngei a club chhuahsan tur ang in thuthang awm mahse Foxes manager Rodgers erawh in an la cham zel a beisei.

Reporter te’n Maddison leh Fofana transfer thuthang chungchang an zawhna Rodgers an chhangin, “An chhuah ka ring lo, he hmuna an cham zel hi kan duh. Heng player te hi kan tan an pawimawh em em a, zawrh lai anni lo. Club chuan player hralhchhuah kan nei thin ngei mai amaherawhchu kan player tha ber ber te hi an cham zel theihnan theihtawp kan chhuah thin. Tuna kan sawi lai mek Maddison leh Fofana te hian training an zawm tha a, an fit em em bawk. Chawlhni a kan match turah an inpeih at tawh” a ti.

Foxes hian naktuk chawlhni tlailam dar 6:30 hian tun season a an Premier League game hmasa ber an khel dawn a, Brentford chu King Power Stadium ah an lo mikhual ang.

Related Posts

error: Content is protected !!