Premier League inkhelah Chelsea chuan an khelmual Stamford Bridge ah Leeds United an lo mikhual a, mual neitu lam hian Wesley Fofana goal khat hmangin hnehna an chang a, point 3 hlu tak an hlawhchhuak.
He goal hi minute 53 na a lut niin corner atanga Ben Chilwell ball cross chu Fofana hian a tauh lut. Tihian Chelsea in an game hnuhnung 3 a goal an khung loh hnuin game 4-na ah goal an khung ve leh ta. Tin, goal khung harsat tak Blues hian an game hnuhnung 7 ah goal 2 chauh an khung bawk.
Chelsea hian 2023 atanga chhiarin game 12 an khel tawh a, vawi 2 chiah hnehna an chang (Win -2; Draw -4; Loss -6).
Leeds United hian tun season away a London club pali an hmachhawn tawh ah an la tlawm fai vek.
Wesley Fofana hi tun season a Chelsea tana league goal khung thei player 13-na a ni a, Arsenal (14) chauh hi season kal mêk a Chelsea aia league goal khung thei player nei tam zawk anni.
Graham Potter hian Premier League ah Leeds United chu tum 6 hmachhawn tawhin vawi 4 hnehna a chang a, match hnih dangah erawh draw result a nei. Premier League a Graham Potter hneh zin ber team chu Leeds United hi anni nghe nghe a, zanina hnehna a chang leh pawh hi a mak hran lo ve.
Chelsea game leh tur hi UEFA Champions League Round of 16 2nd leg niin 1st leg a sikhat faia an ngam loh Borussia Dortmund chu Stamford Bridge ah an lo mikhual ang. Leeds United lam ve thung hi league ah Brighton nen an inhmachhawn dawn.