Real Madrid defender David Alaba chuan Best FIFA Men’s Player award dawng tura Karim Benzema a dah hmasak ber loh chhan social media kaltlangin a sawifiah.
Benzema hian season hmasa khan a team chu Laliga leh UEFA Champions League te a chawipui a, 2022 Ballon d’Or a dawng zui bawk. Amaherawhchu Paris Saint Germain forward pahnih Lionel Messi leh Kylian Mbappe te’n World Cup tha tak an hman avangin FIFA Best Men’s Player Award dawng tur a chiang ta lo.
Nizan zanlai khan Paris khawpuiah he lawmman hi sem a ni a, Argentina World Cup champion puitu Lionel Messi chuan he lawmman hi dawngin a tum hnih dawn na a ni nghe nghe bawk.
National Team captain theuh te’n he lawmman dawng tur vote pathum an thlak thei a, Austria captain David Alaba chuan he lawmman dawng turin Lionel Messi chu a dah hmasa ber a, a pahnihna ah club lama a teammate Karim Benzema dah leh in a pathumna ah France forward Kylian Mbappe hming kan hmu bawk.
National Team captain theuh te’n an vote thlak dan tarlan anih hnuin David Alaba vote thlak danah Real Madrid fans te an thinrim hle a, social media lamah an defender hi chi inthliarna hmang te’n an bei zui chiam!
Heng hi Alaba chuan a lo hmuh in Twitter kaltlangin engvanga Benzema dah hmasa ber lo nge a ni tih a sawifiah.”FIFA Best award chungchanga ka sawi duh chu he award dawng tura vote thlak kawngah Austrian National Team player tin te an pawimawh a, keimah mimal ngaihdana thil kalpui ka nilo. Team a player awm zawng zawng te’n kan vote a, chuta tanga thutlukna siam pawh kan ni” tiin.
Alaba chuan sawi chhunzawmin,” Mi zawng zawng in an hria, a bikin Karim Benzema hian engtiang takin nge ka ngaihsan tih a hria. A khelhdan zawng zawng te hi pui ka ti hle a, khawvela striker tha ber a ni tih hi ka sawi fo thin. Chu chu rinhlelh rual lova thil nih dan pawh a ni” a ti.