Liverpool player hlui Danny Murphy chuan Chelsea in January transfer window inkhar nia an lakluh Enzo Fernandez chu £100 million a hlu player anih loh bakah Manchester khaw club hnih midfielder Casemiro leh Rodri te aia tha anih loh thu a sawi.
Fernandez hi British football a player lakluh to ber ni turin thlasik transfer bazar liamta ni hnuhnung ber khan £115 million in Benfica atangin Chelsea a zawm a, a lakah Blues fans te beiseina pawh a sang narawh e.
Kum 22 a upa hian Stamford Bridge ah kum 8 leh thlaruk chhung daih tur contract a ziak a, a team league table 9-na a awm mek chu a chunglama kaichho pui a tum dawn.
Danny Murphy chuan Argentina World Cup champion puitu Enzo Fernandez chu player tha tak ni mahse a hlutna baka Chelsea in an leichhuah thu leh Premier League defensive midfielder thenkhat te aia tha niin a hre lo.
“Chelsea hian player te manah uchuak takin sum an inseng a mahse an starting XI tam zawk hi Manchester City tana an inlan phak ka ring lo. Enzo Fernandez inkhel pawh a hmunah ka en fo a, player tha tak a ni, amaherawhchu £100 million man tur erawh a nilo. Casemiro leh Rodri te level a pha lova, Chelsea hian a lakluh nan an inseng hnem lulai deuh a ni. Chelsea dawrna an hmuh rualin club tin mai hian sum tam tak an beisei nghal thin niin a lang” tiin Reds player hlui Murphy chuan Fernandez chu £100 million player anih loh thu a sawichhuak.
Chelsea in Fulham an inhnehtawkpui tumin Enzo Fernandez hian Blues tana a game hmasa ber a khel a, goal khung lo mahse midfield laia a che tla vel a hmuhnawm hle. Blues in an game leh ah West Ham United an tlawh dawn a, FIFA World Cup 2022 Young Player of The Tournament Award dawngtu hi a inlan leh ngei a rinawm.
