Ferdinand chu ni êm lo mahse a tha tawk – Chiellini

Defender sawisel hlawh tak Harry Maguire chu Italian international Giorgio Chiellini an defender tha tak niin a ngai a, a man to vanga an demna erawh pawi a ti hle thung.

England international Maguire hian 2019 khan Leicester City atangin Manchester United chu £80 million in a zawm a, a man a to êm avangin a lakah fans beiseina a sang nghal hle. An beisei ang erawh in Maguire a che tha lova, he thil avang hian Chiellini chuan kum 29 a upa Maguire hi a lainat hle niin a lang.

” A dinhmun avang hian pawi ka tihpui hle a, a chhan chu Maguire hi player tha tak anih vang a ni. A lak atanga hian an beisei sang mah mah. £80 million an pekchhuah avangin game zawng zawngah a khel tha ber zel tur tihna a ni em ni? Chu chu a ni theilo. Kan transfer manah player te hian tih theih kan nei tam lo hle” tiin Juventus defender hlui Chiellini an defender sawisel hlawh tak Maguire a chhan.

Euro 2020 nomawi chawitu chuan sawi chhunzawmin,” Ani (Maguire) leh Stones te hi an inkawp fuh hle. Ni e, Maguire hi Rio Ferdinand chu a ni lo, mahse player tha tak zawng a ni. Tun anga a dinhmun atang hi chuan England tan a tangkai tur ang in a tangkai dawn lo. England hian World Cup an chawi duh anih chuan an player pawimawh ber pakhat (Maguire) hi enkawl thiam rawh se” a ti.

Related Posts

error: Content is protected !!