Paris Saint Germain fans thenkhat te’n Neymar chu club chhuahsan tawh turin duh viau mahse Brazilian international hian kuminah Parc des Princes chhuahsan tumna a neih loh thu a sawi.
Kum 31 a upa hian 2017 khan £192 million in Barcelona atangin Paris Saint Germain a zawm a, football history a player lâkluh to ber a ni. Neymar hian PSG tan kum 6 chhung inlan tawh mahse tun thlengin UCL a la chawi pui thei lova, a inhliam ngun bawk nen, fans thenkhat te’n an ning ve ta hle niin a lang.
Kumin kumtirh khan PSG fans thahnem tak chu Neymar in kawtah pungkhawmin Brazilian star hi club chhuahsan tura an duh thu an auchhuahpui hial a, inkhel mualah lah vawi tam an boo khum bawk.
Lionel Messi an free agent a PSG a chhuahsan hnuin Neymar leh Mbappe te pawh kumina French khawpui chhuahsan tura ngaih te anni a, Mbappe hi Real Madrid nena sawizawm an nih laiin Neymar erawh a club hlui Barcelona leh Premier League club lian Chelsea leh Manchester United te nena sawizawm anni.
A hma hun tura titi a tam viau laiin Neymar chuan PSG la chhuahsan mai a tum loh thu tun hnai maia Caze TV in an kawmna ah a sawichhuak. Neymar chuan, “Season thar hi PSG a ka khelh ka beisei a, contract ka la nei bawk. Tun thleng chuan tumah in engmah min la hrilh lo. Player leh fans te inkarah inkungkaihna tha a awm lo anih pawhin ka chiai lem lo. Hmangaih ka ni emaw nilo emaw, ka inkhel zel ang” a ti.
PSG in manager thar atana an lâkluh Luis Enrique hian Barcelona ah Neymar Jr hi a lo enkawl tawh a, Spanish manager hian Barca a enkawl hmasak ber tumin a a treble pui nghe nghe. Hemi season (2014-15) hian Neymar a che tha takzet a, Barca tan inelna hrang hranga game 51 a inlan atangin goal 39 leh assist vawi 10 a thawkchhuak a, Laliga, Copa del Rey leh UEFA Champions League te a chawi.
Season tharah Luis Enrique enkawlna hnuaiah ngei Neymar a inkhel leh thei dawn a, tha zawka a lo kir ngei a rinawm. Kum 31 a upa forward hian Parc des Princes ah kum 2025 thleng daih tur contract a la nei a, a contract neihlai hi thla 12 dang pawhsei theih tur a ni bawk.
