Football legend Fabio Cannavaro chuan tun season UEFA Champions League-ah Chelsea chu an champion nawn leh dawn niin a sawi.
Nizan Chelsea leh Zenit St. Petersburg khelhah khan 3-3 in an indraw a, hemi avang hian an awmna group bikah Juventus chu pakhatna hauhvin, Chelsea erawh pahnihna anni. Chelsea hian Champions League round of 16 ah Real Madrid emaw Bayern Munich an hmachhawn dawn a, an tan chuan a huphurhawm viau dawn niin a lang.
Kan hriat angin Thomas Tuchel naute hi tun hnai hian an che tha lo em em a, all competion match 4 an khelh hnuhung atang vawi 1 chiah hnehna an chang. Mahse, Italy legend Fabio Cannavaro chuan Chelsea in Champions League nomawi an hum theih ngei a ring.
“Chelsea hian an nomawi an hum theih ka ring. Manager ropui tak Thomas Tuchel an nei a, team tha tak anni bawk” tiin Fabio Cannavaro chuan Walfoot a hrilh.
Cannavaro chuan Real Madrid in a zawna vawi 3 lai mah Champions League nomawi an chawi chungchang sawiin, hriat reng tlak a nih thu a sawi a. Mahse, tun season erawh English club te champion ngei turin an inbuatsaih niin a sawi bawk.
“Real Madrid in kum 3 chhung nomawi an chawi, hei hi club leh Zidane tan chuan hriat reng tlak a ni. Mahse, Champions League a hnehna chan dawn chuan, thil tawn tur tamtak a awm. Kei chuan, English club te an inbuatsaih tha hle ka ti” tiin a sawi.
Source SK