Everton chuan Manchester United forward Anthony Elanga lakluh an tum dawn a, Swedish international hi Red Devils chuan £15-20 million velin an chhuahtir phal nia report a ni.
Kum 21 a upa hian 2021 khan Manchester United tana a game hmasa ber a khel a, tun thleng hian a team tan inelna hrang hrangah game 55 khel tawh in goal 7 leh assist vawi 6 a thawkchhuak tawh. Elanga hian season hmasa khan Man Utd tan game 26 (8 starts) inlan mahse goal a khung lova, assist erawh vawi 2 neiin season tha tak a hmang lem lo.
Swedish forward hian kumin January thla khan loan in Everton a zawm hman tep a, amaherawhchu loan fee ah club pahnihte an inrem theih mai loh avangin kum 21 a upa forward hian Goodison Park a pan thei ta lo.
Everton chuan Elanga hi £10 million vela lakluh an duh laiin Man Utd lamin erawh an forward manah hian £15-20 million inkar an phut a, indawrna an kalpui chho mek.
Elanga hi Everton bakah Nottingham Forest leh German club thenkhat te’n an beisei mek nia sawi a nia, kum 21 a upa hian kumin nipui bazarah Old Trafford a chhuahsah ngei dawn niin a lang.
Red Devils hian transfer budget £120 million chauh an nei a, Chelsea atangin Mason Mount chu £60 million a lalut fel tawh in kumin nipui bazara an player lakluh hmasak ber leh awmchhun a la ni. Goalkeeper leh striker thar lalut turin an sum la bang zawng £60 million chu a beitham deuh dawn a, chuvang chuan Man Utd hian player hralhna atanga sum engemaw zah an hailuh ve a tul.