Nizan zanlai khan Europa League round of 16 first leg khelh zawh a ni a, Premier League team pahnih Manchester United leh Arsenal te pawh inlan ve in an result hlawhchhuah erawh a dang hret.
Arsenal hian Sporting CP an luhkhung a, 2-2 a an inhnehtawk pui laiin Manchester United lam erawh in 4-1 in an khingpui Real Betis chu Old Trafford ah an lo sawp thung.
Arsenal player tha thenkhat te’n inkhel bul an tan lova, goalkeeper duhthlan hmasak Ramsdale pawh a inlan lo. He match ah hian Gunners lam atangin Saliba chuan goal khat a khung a, Morita chuan an mahni lamah a tilut palh bawk.
Mual neitu Sporting CP lam atangin Inacio leh Paulinho te chuan goal khat ve ve an khung a, nimahsela an team te hnehna an chan pui zo lo.
William Saliba goal khung tur assist tu Fabio Vieira chuan season kal mêk ah Gunners tan inelna hrang hrangah assist vawi 6 a nei tawh a, ani aia Gunners player te atanga assist ngah zawk chu Bukayo Saka (9) chauh a ni.
7-0 zeta Liverpool laka an mualpho hnuin Manchester United an insiamtha nghal thuai a, Real Betis lakah 4-1 a hnehna changin zahngaihna an lantir bik lo.
He inkhelah hian Red Devils tan an hmatawng pali Rashford, Antony, Fernandes leh Weghosrt te chuan goal khat theuh an khung a, Betis lam atangin Leicester City forward hlui Ayoze Perez an goal khat a khung ve.
Real Betis laka goal khat khungtu Marcus Rashford chuan tun season ah Manchester United tan inelna hrang hrangah goal 26 a khung tawh a, Europe top 5 league atangin ani aia goal khung tam zawk chu Kylian Mbappe (30 goals) leh Erling Haaland (33 goals) te chauh anni.
Tun season ah Man Utd chuan inelna hrang hrangah vawi 31 lai mai hnehna an chang tawh a, Europe top 5 league atanga hnehna chang tam ber club anni. Pahnihna ah hian Barcelona, Napoli, Paris Saint Germain, Manchester City leh Real Madrid te an awm a, heng club te hian season kal mêk ah vawi 27 theuh hnehna an chang tawh.
Manchester United hian an game leh ah Southampton chu league ah an hmachhawn dawn a, Arsenal lam pawhin Fulham an tlawh ve bawk ang.