Europa League lama che tha Marquinhos faktu Arsenal legend

Arsenal defender hlui Martin Keown chuan nizan Europa League match a che tha tak Arsenal rawlthar Marquinhos a fak hle a, a lakah beiseina sang tak a nei.

Nizan inkhel ah Arsenal chuan 2-1 in FC Zurich an hneh, point 3 an hawn. North London club tan Marquinhos an hmahruaina goal a khung a, mual neitu lam in Kryeziu penalty goal hmang in an siphurh sut mahse minute 62-na a Nketiah chuan Gunners tan chakna goal a rawn khung.

Tun nipui bazar a Emirates Stadium pantu Marquinhos an Gunners tana a game hmasa berah goal 1 leh assist vawi 1 a nei a, a che tha hle.

”Inkhel hmuhnawm tak kan thlir a, a bikin Marquinhos kha Saka anga mai in a che. Dinglam sira khelin ke veilam hmang thiam a ni. Goal khat leh assist vawi khat a nei a, manager tan chuan a lawmawm hle. Tunah chuan Arteta hian ‘awle kan mamawh hun chuan a hmantlak ngei ang” a ti thei tawh ang” tiin Arsenal legend Keown an nizan a che tha Brazilian international Marquinhos a fak.

Keown chuan kum 19 a upa chungchang sawi chhunzawm leh in,” Hma hun eng tak a nei. Gnabry ang deuh chi a ni in ka hria, player sang lem lo, che rang, goal hmaa hlauhawm leh class em em a ni” a ti.

Tun season Europa League Group A ah Arsenal hi PSV, Budo/Glimt leh FC Zurich te nen an awm hova, table chung ber luah chhunzawm zel a group stage an khelh zawh a beiseiawm hle. Tin, Premier League lamah pawh Gunners hian game 6 an khelh atangin point 15 an hlawhchhuak tawh a, table chung berah mawng an hung mêk.

Related Posts

error: Content is protected !!