European Championship 2020 chu an khel chho mek a, a hmawr bawk an hnaih dawn tan tawh
nghe nghe a. Kumina tournament an khelhah hian mahni lama goal thun a lar riau mai a, kum
danga an lo tih tawh thin zawng zawng aiin own goal hi a tam tawh a ni.
Euro 2020 khelh tawh chinah mahni lama goal thun hi 10 lai chu a awm tawh a, kum danga
tournament an buatsaih thinah chuan tournament khata hetiang zat mahni lama goal thun hi a la
awm tling ngai lo a, a lawmawm loh zawngin record thar chu an siam a ni ta ber mai.
Quarter final-ah khan mahni goal lama thun an awm leh a, Spain leh Switzerland inkhelh tumin
Jordi Alba ball pet phei chu Denis Zakaria chuan a lo dang per a, anmahni goal ah chuan a lut a,
Zakaria hi goal thuntu anga ziah luh a ni a, Spain tana lawmna siamtu a ni.
Turkey leh Italy an inkhelh tum khan Turkey defender Merih Demiral chuan anmahni lamah goal a
thun a, Turkey player goal thun zarah Italy chuan hma an hruai theih phah a. Hei hi kumin
tournament-ah chuan mahni lama goal thun hmasak ber niin, he mi hnuah hian mi dang pawhin
mahni goal ah an thun ve nual bawk a ni.
Merih Demiral ang bawk hian Lukas Hradecky, Mats Hummels, Wojciech Szczesny, Ruben Dias,
Raphael Guerreiro, Martin Dubravka, Juraj Kucka, Pedri leh Zakaria te chuan anmahni lamah goal an
thun theuh a, tun tum tournament bikah chuan mahni lama goal thun hi 10 an awm ta chiah a ni.
Euro 2020 hmaa European Championship vawi 15 neih tawhah tournament khat chhunga mahni
lama goal thun hnem awm tam ber tumin vawi 9 an thun a, kuminah hian record ding lai chu an
khum ta der a ni.
Match khelh hmabak a la awm nual a, hengah hian mahni lama goal thun an la awm belh thei bawk
a, an thun belh zel chuan record thar an siam belh zel tihna a ni tawh mai dawn a ni.