Erling Haaland agent Rafaela Pimenta chuan a client hlut zawng chu €1 billion hu vel anih thu a sawichhuak!
Agent hriathlawh ber te zinga mi Mino Raiola an nikum lama mual a liam hnuin Rafaela Pimenta chuan a ai hi a awh a, French Channel TF1 Telefoot in an kawmna ah Pimenta hian a client Erling Haaland leh Marco Veratti te chungchang a sawichhuak.
”Erling Haalad hi €1 billion a hlu a ni. Chu chu rin dan satliah lam ni lovin thil nihna dik tak a ni zawk. Mite chuan chutiang zatin an lei dawn lo, thil atthlak tak a ni an ti a ni mahna amaherawhchu a kum, a quality, a hmasawn chho dan leh a nungchang zawng zawng avang te hian €1 billion sawi kai ngam ka ni” tiin Pimenta chuan Haaland chungchang a sawichhuak.
Norwegian striker hian tun season ah Manchester City tan game 30 a inlan atangin goal 32 a khung tawh a, tun hnai te hian beisei a pha lo deuh em aw tih theih tur ni mahse a goalscoring stats erawh a chhe lo hle. Kum 22 upa hian Etihad Stadium ah kum 2027 thleng contract a la nei a, club dang tan chuan han leichhuah hi thil awlai a ni dawn lo.
Pimenta chuan PSG midfielder Marco Verratti chungchang sawi leh in,” Verratti hian PSG a hmangaih em em a, club dang pan tura han ngaihruat pawh hi thil theihloh a ni” a ti.
Italian midfielder hian kum 2012 khan Paris Saint Germain hi a zawm a, heta tang hian PSG player pawimawh la ni chho char char in season kal mek ah pawh kum 30 a upa hian club tan game 25 a inlan tawh.
