English midfielder Bellingham faktu Alaba

Real Madrid defender David Alaba an Borussia Dortmund midfielder Jude Bellingham a fak hle a, midfielder talent nei tha ber te zinga mi niin a ngai. Signal Iduna Park a season thum contract la nei Bellingham hi tun hnai kuma Dortmund player pawimawh ber pakhat a ni chiang.

England international hian 2020 khan £25 million in Birmingham City atangin Borussia Dortmund a zawm a, German club tan hian game 98 inlan tawh in goal 12 leh assist vawi 19 a nei tawh.

Hma hun eng tak a nei tih an hriat avangin European club lian pahnih Real Madrid leh Liverpool te pawn lakluh tum in tan an khawh.

”Bellingham hi khawvela midfielder talent nei tha ber te zinga mi a ni. A la naupang em em a, kum 19 chauh a upa mahse nise inkhel mualah a biru mai lova, a duh ang in game a sawi danglam thei tawh” tiin Bayern Munich defender hlui Alaba an Bellingham a fak.

Tun season kal mekah kum 19 a upa hian Dortmund tan vawi 8 inlan tawh in goal 2 leh assist vawi 1 a nei tawh. Three Lions tan pawh Dortmund rawlthar hian vawi 15 a inlan tling tawh a, 2022 Qatar World Cup khel tur England squad ah pawh a tel ngei a rinawm.

January transfer bazar inhawn hunah Bellingham hian Liverpool emaw Real Madrid lam a pan a rinawm bawk.

error: Content is protected !!