England men’s national team te hi tun dinhmunah chuan an tha ang reng hle, engtikniah emaw chuan nomawi pakhat tal an lak nei a rinawm bawk.
Euro 2020 final an luh avang khan khawvel team tha ber pawl an ni tih chu hai rual a ni lo. England ah hian player tha tak tak world class player tamtak an awm nuk a ni.
Tun dinhmunah England hian talent nei tha tak tak an chher chhuak nual a, nakum maia khelh tur FIFA World Cup-ah pawh hian champion tura rinkai ber pakhat an ni mek. England in Jadon Sancho bench a thuttir chungin leh Trent Alexander Arnold tel lovin final an thleng thei kha a ni a, team tha tak anni mek tih chu a chiang.
Engpawhnise, tun tumah hian England player tha zual top 5 te kan rawn tarlang ve leh dawn a ni.
5 Mason Mount (Chelsea)
Summer transfer window liamtaah khan Chelsea chuan sawisel a hlawh leh hle, a chhan chu an academy graduates talent nei tha tak tak thenkhat an chhuah tir avang a ni. Fikayo Tomori leh Tammy Abraham pawh sum tam tak hmangin an chhuah tir a ni.
Blues lam hian an academy atanga chhuak player tha thenkhat chhuahtir mahse, tunah hian Mason Mount, Reece James leh Trevoh Chalobah erawh an chhuahtir phal lo, anni hi an tha hle a, an khelh chhunah pawh lawm an hlawh thei hle.
Mason Mount hi Club leh ram tan player pawimawh tak a rawn ni chho mek a, kum 22 a upa chauh la ni rih mahse, 2020-21 season-a a chet that em avangin Chelsea Player of the Year atan thlan niin, he award hi a phu ber a ni.
4 Jack Grealish (Manchester City)
Tun summer transfer window inhawn lai khan Jack Grealish hian news a luah hneh hle. A chhan chu Aston Villa chhuasana Manchester City a pan vang a ni. Man City khan £106 million dawn tepin an la lut.
Season khelh zawh takah khan Jack Grealish hi Premiere League player tha ber pakhat a ni. Dribbler ah a tha em em a, ball siam lamah pawh duhthusam a ni. England international hi wings leh no 10 position-ah pawh a khel thei bawk. Tun dinhmunah Premiere League player zinga talent nei tha tak pakhat ani mek.
Manchester City lama a insawn hnu pawhin season bul a tan tha leh hle. Mahse, a thatna tak tak tih lanna turin ni tamtak ala khelh rih phawt a ngai dawn a ni.
3 Harry Maguire (Manchester United)
Harry Maguire centre back tha ber pakhat ani mek. Manchester United chuan Leicester City atangin £78.3 million lai maiin an la lut a, khawvel centre back man to ber a ni mek.
Tunah hian Manchester United captain ni mekin rinawl ber pakhat ani bawk. Euro 2020 ah pawh khan Man City CB John Stones nen inkawpin an chet tha hle.
2 Luke Shaw (Manchester United)
Luke Shaw hi tunlai football khawvelah left backs tha ber pakhat a ni mek. Hmasawn chak tak pakhat a ni.
Shaw talent neih chunchang hi zawhna awm ngailo a ni. Southampton atang khan a hming rawn chher tanin. Kum 2014 khan Manchester United chuan Pound maktaduai 34 in an la lut a, hliam neuh neuh te a neih avangin kum 2015 phei kha chuan football a chawlhsan teuh hle.
A hliam neih te a dam fel hnuin, first team lamah a rawn kir leh a, mahse, Man Utd manager Jose Mourinho duh player a ni tlat lo, Luke Shaw chet dan chu vawi tamtak a sawisel nghe nghe.
Ole Gunnar’an Man United a enkawl hnuah Luke Shaw tan kawng a inhawng leh a, tunah phei chuan Manchester United first choice left back a nih phah. Season liamta khan a chet that avangin Manchester United Players’ Player of the Year award a dawng.
1 Harry Kane (Tottenham Hotspur)
Khawvel striker tha ber anga an sawi Robert Lewandowski el pha tura an sawi thin pakhat chu Harry Kane hi a ni.
Kane hi striker nih tlin tak a ni. Ball siamah a tha a, goal khung lamah pawh a duailo hle. Kum engemaw ti chhung chu club leh ram tana a chet dan a tha hle. Season liamta kha a career-a season a hman that ber tum ani hial maithei.
Premiere League match 35 a inlan atangin goal 23 a khung mai bakah assist vawi 14 lai a nei tling. A chet that em avangin Manchester City chuan summer transfer liamtaah khan lak luh an tum ruh hle. Mahse, an duh ang leh tum angin Harry Kane erawh an la lut thei lo. Euro 2020 ah pawh khan goal 4 a khung a, England chu final a luh pui bawk.
Source SK