Nizan Euro 2020 Semi final ah England chuan Denmark chu 2-1 in an hneh hram a, final an lut. Final-ah Italy nen an inhmachhawn ang.
Denmark lam atangin Mikkel Damsgaard chuan minute 30 na velah free kick atang a pet goal a, 1-0 in hma an hruai. Mahse, minute 9 hnu velah Simon Kjaer chuan an lamah a ti goal palh a, 1-1 in an draw leh nghal. Hun pangaiah goal dang a luh belh loh avangin extra time khelh a ni a, Harry Kane chuan minute 104 na velah goal khungin England chuan 2-1 in hnehna an chang ta a ni.
England leh Denmark inkhelh zawh hnu khan stats thar a awm nual a, tun tumah hian stats 5 kan rawn tarlang ve leh dawn a ni.
5. Mikel Damsgaard‘an Euro 2020-ah a vawikhatna atan Direct free kick a pet goal
Euro 2020 ah Denmark hi an che tha ang reng hle. An game hmasa berah Christian Eriksen erawh cardiac arrest avangin a khel chhunzawm thei lo a nih kha. Denmark hi an vannei ang reng a, Group game vawi 2 an khelhah an tlawm ve ve a, Russia an hneh khan knockout round an lut thei hram a ni. European Championship history-ah group game vawi 2 tlawm hnua knockout round lut thei team hmasa ber anni nghe nghe.
Knockout stage-ah Wales leh Czech Republic an pet chhuak a, hemi hnu hian semi final an lut, kum 1992 hnuah a vawikhatna atan Euro semi final an luh lehna a ni bawk.
Nizan England nen semi final a an inhmachhawn khan Denmark lamin goal an khung hmasa a, Mikkel Damsgaard chuan free kick petin goal a khung, kha a free kick pet kha Euro 2020 a direct free kick hmanga goal lut hmasa ber a ni.
Mahse, minute 9 hnuah England lamin an rawn nih rual pui a, extra time khelh hnuah hnehna changin final an lut ta a ni.
4. England in a vawikhatna atan European Champions History-ah own goal atang hlawkna an hmu
Euro 2020 khelh mekah hian own goal vawi 11 lai a lut tawh a, Nizan Denmark in own goal an neih kha England pawhin Euro history-ah a vawikhatna atan own an hlawhchhuah hmasak ber a ni.
3. European Championship history ah Euro 2020 hi extra time khelh tamna ber ala ni
FIFA World Cup history-ah 1990 atanga 2014 thleng khan extra time khel vawi 8 an awm tawh a, mahse, 2020 Euro-ah erawh vawi 7 lai extra time khelhna a awm.
Spain hian a zawnin extra time vawi 3 lai an khel a, Italy-Austria, France-Switzerland leh Ukraine-Sweden te pawhin an khel ve bawk. Nizan extra time khelh kha avawi 7 na a ni.
2. Harry Kane’an England tan major tournament-a goal khung hnem ber a nih rual pui
Group stage lamah goal khung theilo mahse, knockout stage-ah erawh goal a khung thei hle.
England in 2-0 a Germany an hneh tum khan goal a khung a, Quarter final-a Urkaine 4-0 a an hneh tum pawh khan goal 2 a khung. Nizan pawh khan a khung leh bawk. Ti hian England tana major tournament-a goal khung hnem ber khungtu Garry Lineker chu nih rualpuiin, goal 10 ve ve an khung tawh.
1. England in a vawikhatna atan Europeang Championship final an lut
Nizan hnehna an chan hnu khan a vawikhatna atan Euro final an lut. Final ah Italy nen an intum dawn a, hnehna an chang thei mai ang em?
Source Sl