Chelsea centre back Thiago Silva chuan Paulo Dybala chu Chelsea tana signing tha tak anih tur thu leh Chelsea zawm tumna a nei em tih pawh hmaichhanah ngei a zawh thu a sawi.
Italy a report tarlan danin Chelsea chuan Paulo Dybala hi an ngaihven mêk a, Argentine international hian Serie A pawna club dang zawm theihna buyout clause £10 million chauh a nei.
Chelsea boss thar Mauricio Pochettino chuan Dybala hi a duh hle nia sawi a ni a, Tottenham Hotspur leh Paris Saint Germain te a enkawl lai atang tawhin sign a lo tum tawh a ni âwm e.
Sky Italia in an kawmna ah Thiago Silva chuan Formula One race neihna hmun Silverstone ah Dybala a biak thu hetiang hian a sawi, “Paulo Dybala ka hmu a, media te’n Chelsea nena an sawizawm avangin transfer chungchang te ka sawipui a, Chelsea ah rawn kal a tum em tih te ka zawt bawk. World class player a ni a, ani nena khelhdun hi ka châk hle. Min rawn zawm anih chuan Chelsea tana signing pui tak a ni dawn a, eng nge thleng zel dawn kan hre chho thuai ang chu” a ti.
Kumin nipui bazarah Chelsea in player thahnem tak an chhuah tawh a, chutihrualin player thar an sign ve zel bawk. Blues in Dybala an ngaihven mêk a, season hmasa a Roma tana goal 18 leh assist vawi 8 thawkchhuaktu hi Chelsea in an sign thei ngat anih chuan an tangkaipui viau in a rinawm.
Kum 29 a upa Paulo Dybala hian Stadio Olympico runs ah kum 2025 thleng daih tur contract a la nei a, tunah hian chawlh hmang mêk in club dang a zawm loh chuan tun thla tawp lamah pre season training nei turin Roma ah a kir ang.