Dele Alli chuan Tottenham Hotspur manager hlui tuna Chelsea manager ni ta Mauricio Pochettino chu a tana manager tha ber anih thu a sawi.
Spurs midfielder hlui hian Gary Neville an a kawmna ah a career a harsa a tawh; muthil theihna damdawi (sleeping pills) a addict thu te, rilru lama harsatna nasa tak a tawh thu leh kum 24 mi chauh anih laia inkhelh chawlhsan a duh rum rum thu te a sawi a, tunah erawh kum 27 a upa hian ngaiawh leh turin theihtawpa beih a tum.
Dele Alli hian season hmasa ah Feberbahce lama hun a hman hnuin Everton lamah a kir leh a, Everton pre season training nei tura training ground thleng hma ber te zinga mi a nghe nghe.
Alli hian a form nei kir leh turin theihtawp chhuah a tum a, Everton boss Sean Dyche pawhin pre season-a a chet dan a zirin Dele Alli a kawl zel dawn em tih ah thutlukna a siam ang.
A tleirawl chhuahtir phat atanga Spurs tana hming chher tak Alli hian Argentine coach Pochettino chu a tana manager tha ber anih thu Gary Neville an a kawmna ah hetiang hian a sawi, ”Mauricio Pochettino kha ka tan chuan manager tha ber a ni a, khatih hunlai khan ani aia manager tha zawk min enkawl theitu tur dang an awm chuang lo.”
”Pochettino mai bakah a thawhpui Jesus Perez leh Miguel te pawh an tha takzet a, mi hriatthiamna lah an ngah em em bawk. Footballer leh manager inkungkaihna ang chauh hi a nilova, kan inkungkaihna chu kha aia thuk zawk a ni” a ti.