Arsenal player man to ber Declan Rice chuan a team thar chu season thara Premier League title chawi tura an that tawk thu a sawi.
Gunners hian season hmasa khan league title an chawi teuh hle a, ni 248 chhung teh meuh league-a hmahruaitu an nih hnuin season tawp lamah beisei an phâk lova, champion lai City kut ata league title an la thei lo anih kha.
Rilru na taka 2022/23 season khartu Arsenal in chak zawka lo kir ngei an tum a, kumin nipui bazarah pawh team dang aiin transfer window ah sum an hmang tam fal nalh.
North London club hian an squad thawmtha turin player pathum: Kai Havertz, Declan Rice leh Jurrien Timber te an lalut tawh a, heng player pathum mana an sum thehchhuah zat chu £200 million aia tam a ni! Mikel Arteta a la duh tawk mai loh hmel a, tun thlengin Gunners nena sawizawm player thenkhat an la awm cheu.
British player man to ber Rice chuan a team khelhna Arsenal chu season thara league title chawi thei tawh tur an nih thu hetiang hian Sky Sports kaltlangin a sawichhuak, “Season hmasa khan an chawi teuh hle a, tunah hian season hmasa lam aiin kan tha tawh zawk in ka hria a, tawnhriat tha tak team player te an nei tawh bawk. Premier League hi kan chawi tum tur chu a ni leh ngei a, chu bakah Champions League ah pawh a tel ve satliah mai niloin hnehna chang turin kan khel dawn a ni.”
”Arsenal hi league-a champion turin an tha tawk lo tih sawi thawm ka hre fova, mahse chutiang chuan ka ngai ve lo thung. Arsenal a ka hmuh chu Mikel Arteta hnuaia kum tin mai squad chak zawk an din zel dan te, player tin te’n hma an sawn a, level sang zawk an kaichhoh dan te a ni” a ti.
Kum 24 a upa chuan sawi chhunzawmin, “Kan khelhdan tur chungchangah Mikel Arteta nen kan inbe pawp tawh a, khawi hmunah nge tih te leh Arsenal tana ka hmachhawp te min thlirpui. Arsenal project a ka tel ve thei hi ka tan chuan a phurawm takzet a, tunah chuan Arsenal hi an nihna dik taka kira trophy chawi leh tawh a hun.”
