Arsenal chuan West Ham United atangin Declan Rice an lâkluh fel thu an puang a, kum 2028 thleng daih tur contract ziahpuiin thla 12 dang pawhsei theih tur a la ni bawk.
Rice hi tun nipui bazara Gunners player lâkluh thar pathumna a ni a, British player man to ber pahnihna niin a manah North London club chuan add ons nen £105 million lai an insêng. Kumin nipui bazar tho khan Jude Bellingham chuan Borussia Dortmund atangin Real Madrid chu add ons nen £116 million in a lo zawm fel tawh a, kum 20 a upa hi British player man to ber a ni.
Declan Rice an lâkluh chungchangah Mikel Arteta chuan hetiang hian tawng a thlah, “Declan an min rawn zawm thei hi kan lawm hle a, player theihna sang tak nei niin season engemaw zah chhung chu Premier League ah leh England tan tha takin a lo khel tawh. Declan hian Arsenal ah quality sang zawk a rawn chhawmlut dawn a, talent a nei tha in he hmuna hlawhtling theihna chance sang tak a nei.”
“Kum 24 a upa chauh la ni mahse Declan hian Premier League ah tawnhriat a ngah tawh hle a, West Ham team tha tak captain ni thei a ni a, tun hnai maia European title an chawi pawh kan hre fur awm e. A ko a tla mawhphurna tha taka a hlen thin hian min hneh em em a, min rawn zawm hi a phurawm takzet a ni” a ti.
Rice hian a club hlui West Ham tan game 245 a khel a, tun hnai kuma Hammers player pawimawh ber te zînga mi a ni.
Season hmasa khan a captain na hnuaiah West Ham United chuan Europa Conference League title an chawi a, kum 43 hnu meuha Hammers trophy chawi leh hmasak tum a ni hial!