Manchester United manager Erik Ten Hag chuan Barcelona midfielder Frenkie De Jong chuan khawvela eng team squad pawh a tihchak tur thu a sawi.
Ajax coach hlui Erik Ten Hag an Manchester United a pan hnuin a lo enkawl tawh thin Frenkie De Jong lakluh tumin tan a khawh a, amaherawhchu Dutch midfielder hian a pu hlui hnena kir leh ah chuan Camp Nou a cham chhunzawm zel a thlang ta zawk a ni.
Barca ah a cham chhunzawm ta ngei a, Xavi hnuaiah duh ang in erawh a inlan tam lem lova, Camp Nou ah De Jong hma hun tur a chiang lo zel.
Report thenkhat tarlan danin Ten Hag chuan nipui bazar inhawn hunah De Jong hi lakluh leh a tum dawn a, Barca midfielder hian team hmasawn tak Man Utd a zawm hreh lo mahna.
Ten Hag chuan Europa League last 16 play off a an hmachhawn tur Barca midfielder De Jong chu hetiang hian a fak,”2019 khan Ajax ah phurna nasa tak a thleng a, De Jong hi team chawkphur tu ber pawh a ni. Tin, tun hnai kum kalta ah hian Spain ah hma a sawn zual hle bawk” a ti.
Red Devils boss chuan sawi chhunzawmin,”Player tha tak a ni a, a hma zawng aiin tunah hian a tha tawh. A hnunglam atangin game a rawn siam thin a, hun thawl a nei thin. Ani nena thawhdun kha a nuam hle a, khawvela eng team squad pawh tichak zual thei tur a ni. Quality danglam bik tak a nei bawk.”
Sum lama an tlakchhiat avangin nikum lamah Barcelona an talbuai deuh a, amaherawhchu tunah erawh Xavi hnuaiah team tha tak ni tawhin league table ler ah an awm mek a, an hnuaiah chiah champion lai Real Madrid awm ve bawk in team pahnihte hi league game khelh zat in ang ah point 8 laiin an inthlau.