David De Gea chuan free agent a Manchester United a chhuahsan hnuin Inter Milan atangin sawmna dawng mahse a hnâwl a, a hlawh tam theih deuh na tur hmun dang pan a rilrûk.
Daily Record tarlan danin season hmasa UCL finalist Inter Milan chuan Man Utd legend De Gea hi an goalkeeper chhuakta Andre Onana thlâktu tura lâkluh an duh a, season thum chhung daih tur contract ziahpuia season khatah £4 million hlawh pêk an inhuam.
Mahse he offer hi De Gea chuan a hnâwl a, Spain goalkeeper hian season khatah £9 million vel (karkhata £2,22,000) tal a hlawh theihna tur hmun pan a duh thung.
Kum 32 a upa ni tawh mahse De Gea hian Europe a la inkhelh chhunzawm zel a duh a, amaherawhchu Europe ah tuna a hlawh phut zat ang pe ngam club an tam lovang.
Old Trafford chhuahsan tawh mahse De Gea hian khawvela goalkeeper hlawh tam ber te zinga mi nih a la duh fan a, United ah khan player hlawh tam ber niin season 4 chhungin £54 million + bonus a lalut a, tun dinhmunah hetiang zata tam pe thei tu tur chu Saudi club te bak anni lovang. Hetih mêk lai hian De Gea erawh in Europe a la cham zel a duh a, chumi tur chuan a hlawh beisei zat pawh a tihhniam ngei a ngai ang.
Inter lam chuan De Gea an lalut thei dawn lo tih an hriat hnuin goalkeeper thar an zawng mêk a, tun dinhmunah Shakhtar Donetsk goalkeeper Anatoliy Trubin leh Bayern Munich goalkeeper Yann Sommer te chu Onana thlâktu tura rinkai ber ni te anni mêk.