De Bruyne hi tun dinhmuna playmaker tha ber a ni – Roberto Martinez

Belgium head coach Roberto Martinez chuan a player enkawl lai Kevin De Bruyne chu tun dinhmuna playmaker tha ber niin a ngai. Nizan Nations League match-a Belgium in 2-1 a Wales an hneh tumin Manchester City midfielder hian goal 1 leh assist vawi 1 a nei.

”Belgium tantu zawng zawng te hnena ka thil chah duh chu De Bruyne inkhel hi hlut thiam rawh u, a dân ve tur rênga ngaih loh tur. Ka ngaihdan chuan tun dinhmuna playmaker tha ber a ni” tiin Belgium manager Roberto Martinez an De Bruyne a fak.

Spanish coach chuan sawi chhunzawmin,”A game thlir dan te, hun leh hmun awl a hmuh thiam dan te, goal hmaa a hriam zia te hian a that zia an pholang. A chang hi chuan ka en a, ‘Kevin ang player tha bik kan kawl thei hi kan va vannei em aw’ ka ti leh vawng vawng thin” a ti.

Kum 31 a upa hian 2021-22 Premier League player of the Season chawimawina a dawng a, he chawimawina hi 2019-20 season khan a lo dawng tawh bawk.

2014-15 Bundesliga Player of the Year chawimawina dawngtu De Bruyne hian PFA Premier League Team of the Year ah tum li lai a tel tawh a, 2019-20 season khan Champions League midfielder of the Season a thlan a ni bawk.

Tun season kal mekah Belgium international hian Premier League ah assist vawi 6 a nei tawh a, City in tun kum nga chhunga league nomawi vawi 4 an chawi theihnana player thawhhlawk ber pakhat a ni.

Related Posts

error: Content is protected !!