Lille laka an comeback hnuin Paris Saint Germain head coach Christophe Galtier chuan Lionel Messi leh Kylian Mbappe te chu game a danglamna thlentu an nih thu a sawichhuak.
Pathianni tlailam inkhelah league hmahruaitu PSG chuan an khelmual Parc des Princes ah Lille an lo mikhual a, mual neitu hian Mbappe leh Neymar te goal hmanga hma an hruai hnuin mikhual lam atangin Diakite, David leh Bamba te chuan minute 24, 58 leh 69-na ah te goal an rawn khung a, PSG an lehthal.
Christophe Galtier nau te an tlawm tawh dawn emaw tih hnuin France forward Mbappe chuan minute 87 na ah PSG goal 3-na a khung a, hun pekbelh minute 90+5 ah Lionel Messi chuan free kick hmangin PSG chakna goal khung zui leh in a team te hnehna a chanpui.
Lille an hmachhawn tuma goal leh assist thawkchhuak tu Neymar chu kerek hliam avangin minute 51 na ah lakchhuah a ni a, engtia rei nge a chawlh tur thu hriatchian a la nilo bawk.
Inkhelh banah PSG head coach Galtier chuan Messi leh Mbappe te a fak hle a, a chak chhan ber anih thu a sawi. PSG boss chuan,”He game a danglamna thlentu chu Messi leh Mbappe te anni. Game kha kan thunun viau rualin chance kan insiam tam tawk lova, kha aia result tha zawk kha kan phu in ka hria. Amaherawhchu football a ni miau a, thil chu anih tur ang in a thleng” a ti.
Ligue 1 champion PSG hian tun season ah league game 24 an khelh atangin point 57 an hlawhchhuak tawh a, point 7 laiin hma an hruai fal ta. Pahnihna ah hian Monaco an awm a, league game 24 atangin point 50 an hmu ve tawh bawk.
