South America ram lar pahnih Brazil leh Argentina te chu Copa America khelh meka tan hlawh zual
an ni tiin a sawi theih a, India ram atang pawhin heng ram pahnih tantu hi thahnem tak an awm a.
India ramah chuan an inkhelh hun a laklawh hle a, heti chung hian an inkhel en tura zing hma taka
tho tang tang pawh an awm teuh a ni.
Brazil chuan final an lut fel tawh a, Argentina chuan final lut turin vawi khat chak an la mamawh
thung a. Tournament hmawr an bawk dawn hnai tawh a, Copa America khel zingah tu te hi nge
India ramah rawn kal tawh tih han thlir kual ila.
1. Lionel Messi (Argentina)
Argentina leh Venezuela te chu September 2, 2011 ah khan Kolkata khawpuiah an inkhel a, hetah
hian Lionel Messi chu an ram team captain hi a ni a. He inkhelah hian Argentina chu 1-0 in an chak
a, Messi chu player zinga lawm hlawh ber niin, he inkhela goal awm chun Nicolas Otamendi thun
tur chu a siamsak nghe nghe a ni.
2. Sergio Aguero (Argentina)
Manchester City legend Sergio Aguero pawh hi Kolkata khawpuia Venezuela leh Argentina te
friendly match khelhah hian a tel a. Bul tantu zingah Aguero hi chu a tel lo a, substitute bench
lamah bul a tan a, minute 77 ah Gonzalo Higuain thlakin khelmualah a lut ve chiah a ni.
3. Angel Di Maria (Argentina)
Kolkata khawpuia Venezuela hmachhawntu zingah Paris Saint-Germain star Angel Di Maria hi a tel
a, a tir atangin a khel a, minute 90 chhung chu khelmualah hun a hmang a ni.
4. Nicolas Otamendi (Argentina)
Venezuela leh Argentina te friendly match khelhah Kolkata khawpuia goal awm chhun chu Nicolas
Otamendi hian a thun a, an ram team chu 1-0 in a chakpui a. Manchester City defender hlui hian
minute 70 ah goal hi a thun a, Lionel Messi chuan corner an hlawh chu petin, heta ball kal hi
Otamendi hian a lo thun a ni.
5. Roberto Firmino (Brazil)
2014 kumah khan Liverpool star hi India ramah a rawn kal mai pawh a ni lo, Mizoram ah a rawn
inkhel a, chhangban pawh a ei tawh ngat. Khatih lai khan Bundesliga team TSG Hoffenheim player a
la ni a, Mizoram All-Star XI nen an inkhel a, German club hi Lammual-ah 3-0 in an chak a ni.
6. Vinicius Junior (Brazil)
Vinicius Junior hian 2016 kumah khan India ram chu a tlawh a, Goa khawpuia BRICS U17 Football
Club inelna an buatsaihah a rawn tel a. He tournament-ah hian Selecao chu an champion a, match
4 an khelhah an chak kim vek a, India pawh 3-1 in an hneh a. Real Madrid player hian he
tournament-ah hian goal 3 a thun a, India lakah pawh goal 1 chu a thun a ni.
7. Leandro Campaz (Colombia)
India ramah 2017 kumah khan U17 World Cup an nghat a, hetah hian Colombia pawh telin Leandro
Campaz chu India ramah a rawn kal ve phah a. Group A ah Colombia chu USA, Ghana leh a
thlengtu India te nen an awmho a. Leandro Campaz telna Colombo hian India chu 2-1 in an hneh a
ni.
8.Roberto Rosales (Venezuela)
Spanish club Leganes left-back Roberto Rosales hi 2011 kuma Venezuela leh Argentina te’n Kolkata
khawpuia friendly match an khelh khan a tel ve a ni.
9. Josef Martinez (Venezuela)
Argentina leh Venezuela te’n Kolkata khawpuia friendly match an khelh dawn khan Venezuela aiawh
turin Josef Martinez chu an ko tel a. A teammate Roberto Rosales angin Martinez hi chuan
khelmualah hun a hmang ve ta lo.
10. Braian Ojeda (Paraguay)
Midfielder Braian Ojeda hi 2017 kuma India rama FIFA U17 World Cup khelhah khan telin Paraguay
U17 team ah a tel a. Paraguay chu group match vawi thum khelhah an chak vek a, round of 16 ah
USA chu 0-5 ngawtin an hneh lo thung a ni.
Source Goal