Contract thar chungchangah Kante leh club hotute inhmu thiam lo

Chelsea leh N’Golo Kante te chu contract thar chungchangah an inhmu thiam lova, French international hi Stamford Bridge ah a la cham zel dawn em tih hriat a ni ta lo.

Athletic chanchinbu tarlan dan in Chelsea hian kum hnih leh thla 12 dang pawhsei thei tur contract chhawpchhuak mahse heihi 2018 a World Cup nomawi chawitu kum 31 a upa hian a pawm lova, kum hnih aia rei tur contract ziah a duh. Tun nipui transfer bazar liamta a Blues lakluh kum 31 tho a upa Kalidou Koulibaly chu kum li daih tur contract ziahpui a nih kha.

Kante hian 2016 khan Leicester City atangin Chelsea a zawm a, Blues in Premier League, Champions League leh Club World Cup te an chawi theih nana player pawimawh a ni.

Defensive midfielder taima em em mai Kante leh Chelsea hotute an inbe fel theilo anih chuan nakkum nipui bazar ah a thlawn in a chhuak thei ang. Chelsea lam hian a thlawna chan an duh loh anih chuan thlasik bazar inhawn hunah an hralhchhuah a tul ang. A contract neih lai a hman zawh tep tawh avangin erawh to taka hralhchhuah a harsa ang.

August thla khan Sportmail chuan Ligue 1 club hausa Paris Saint Germain in Kante an ngaihven tih a tarlang a, French midfielder duh tu zingah Premier League club pahnih an sawi tel bawk.

Tunah hian Kante a inhliam mek a, tun season ah Blues tan game hnih chiah a la khel. Beisei anga thil a kal anih chuan September thla tawp lamah Kante a lokir ang.

error: Content is protected !!