Paris Saint Germain chuan a tum khat nan Lionel Messi contract thar chungchangah Messi aiawhtute nen inbiakna an neih thu Italian journalist Fabrizio Romano chuan a tarlang.
Argentine forward hian tun season bak Parc des Princes ah contract a nei tawh lova, contract thar a ziak dawn em tih lah hriat va ni suh.
Report thenkhat tarlan danin Messi hian Paris ah a career chhunzawm zel a duh a, report dang tarlan dan erawh chuan contract thar ziah a tum lova, MLS club Inter Miami emaw Saudi club Al Hilal lam a pan ang.
Engpawhchu nise PSG hian an forward kum 35 a upa hi la chelhbeh an duh a, club a a cham theihnan thapui an thawh mek. Messi pa leh a agent ni bawk Jorge Messi chuan contract thar chungchang hi a ngaituah mek nia sawi a ni a, a contract rei zawng leh player hlawh chu a dah pawimawh hmasak ber tur a ni ang.
Barca atanga PSG zawmtu Messi hian Ligue 1 champion tana a season khatna ah beisei a pha lova, a season hnihna (tun season) ah erawh club tana player pawimawh niin Ballon d’Or vawi 7 dawng tawh tu hian season kal mek ah a team tan goal 15 leh assist vawi 14 (all competition) a thawkchhuak tawh a ni.
Messi hian nikum khan Albiceleste chu FIFA World Cup trophy a chawi pui a, game 7 a inlan atangin goal 7 leh assist vawi 3 a thawkchhuak. Best player of the Tournament a thlan niin FIFA World Cup Golden Ball tum hnih a dawn na a ni nghe nghe bawk.
Kum 2023 ah erawh Messi hovin PSG in bul an tan tha tehchiam lova, an game hnuhnung berah an khelmual Parc des Princes ah ngei mai German champion Bayern Munich chu sikhat faiin an ngam lo. Tin, PSG hi a zawnin match thum an tlawm tawh a, Bayern an hnehloh hma hian Monaco leh Marseille te lakah an lo tlawm tawh bawk.