Netherlands striker Cody Gakpo zawm tum tak zawk chu Liverpool niloin Manchester United anih thu PSV head coach Ruud Van Nistelrooy chuan a sawichhuak.
Cody Gakpo an World Cup khelh zawh takah khan Netherlands tan game 5 a inlan atangin goal 3 a khung a, player che tha pawl a ni. January transfer window a inhawng a, Premier League club lian pahnih Manchester United leh Liverpool te nena sawizawm niin a tawp ah erawh Gakpo hian Jurgen Klopp team a zawm ta a ni.
Kum 23 a upa hian Anfield a pan chhan ah Reds defender Virgil van Dijk a inrawlhthuk hle a, World Cup lai atang tawhin player pahnihte hi transfer chungchangah an lo titi dun fo tawh nia sawi a ni.
Gakpo an Anfield a pan ta ngei a, a manah Reds chuan pound 45 million (add ons tel in) an inseng. A team thar tan beisei a la pha lova, tun season chawhma lama PSV tana league goal 9 leh assist vawi 12 thawkchhuak tawh tu hian Reds kawr ha in game 6 lai inlan tawh mahse goal a la khung lo.
PSV head coach Van Nistelrooy chuan Gakpo an Liverpool ni lovin Man Utd zawk zawm a tum thu leh Van Dijk thlemna avanga Anfield lam pan mai anih thu hetiang hian a saiwchhuak, ”Cody Gakpo zawm tum tak zawk chu Manchester United a ni. Nipui transfer bazar nghak thleng turin thurawn ka pe a, amaherawhchu thil engemaw a thleng a, ka thurawn pek chu zawm lovin Van Dijk thlemna ah tlulutin LIverpool lam a pan ta a ni” a ti.
Man Utd lam pawhin Liverpool laka Cody Gakpo an chan hnuin Netherlands mi tho Wout Weghorst chu loan in thlaruk chhung atan an hawh a, kum 30 a upa hian a club thar tan game 5 a inlan atangin goal 1 a khung ve tawh a ni.
