Coach thar vanga Chelsea a kir tur Lukaku?

Thomas Tuchel an Chelsea a chhuahsan tak avangin 2022-23 season zawha Romelu Lukaku chu Stamford Bridge lamah a kir leh maithei.

Belgian international hian 2021 nipui bazar lai khan £97.5 million in Chelsea a zawm a, Blues tan season khat a hman hnuin a club hlui Inter Milan lamah loan a thawnkir lehnghal a ni.

Inter Milan CEO Giuseppe Marotta chuan season tawp ruala Lukaku chungchangah Chelsea nen inbiakna an neih tur thu sawiin,”Thuthar a ni. Coach thar an neih avangin Romelu hma hun tur a danglam dawn em tih ka hrelo. Lukaku hi a tha thei ang bera chhuah kan duh a, season tawp ah erawh a chungchang thuah Chelsea nen inbiakna kan nei leh ang. Coach thar an neih avangin Chelsea ah a kir leh dawn em tih erawh ka hre bik hauh lo” a ti.

Chelsea player man to ber Lukaku hian season hmasa khan game 42 inlan in goal 13 chauh a khung a, a laka beiseina an neih a tihlawhtling zo lo. Lukaku hian Blues tana a game hmasa pathum ah goal li khung mahse a che tha chhunzawm thei ta lova, Premier League ah goal khung leh turin December thla a nghah thlen a ngai.

Sky Italia in an kawmna ah Lukaku hian Chelsea a a hlawhtlin loh chhanah manager Thomas Tuchel tactic a puh a, Inter Milan chu hun lo taka chhuahsan anih thu a sawi bawk.

Related Posts

error: Content is protected !!