Kan hriata angin UEFA Champions League Round of 16 draw that leh a nih khan Atletico Madrid chuan Manchester United an hmachhawn dawn a, hemi chungchangah Atletico Madrid forward Luis Suarez chuan a team chuan ‘Club tha ber pakhat’ Manchester United chu hneh ngei se tih a duh.
Atletico Madrid leh Manchester United hi an khelhna league lamah duh angin an che tha lem lova. Chuvang chuan an khelh tur pawh hi an inhnehtawk viau a rinawm. Team pahnih te intum tur hi an tan pawh a tha ve ve niin a lang.
Bayern Munich emaw Paris Saint-Germain hi chu an tan an lian deuh hlek maithai, tun season khelh mekah an che tha ang reng hle.
Kum 2016 atang khan Atletico Madrid hi Champions League lamah an hriam lo hle a, mahse, tunah chuan forward thar Luis Suarez anneih tawh avangin inrintawkna an neih belh ngei ang. FC Barcelona striker hlui Luis Suarez chuan Manchester United chu khawvel club tha ber pakhat annih thu a sawi.
“Draw ka hmuh khan, Champions League ah hnehna kan chan ngei a ngai a, club tha ber pakhat kan hneh a ngai bawk tiin ka ngaihtuah. United hi khawvel club tha ber pakhat anni. Kan theihna zawng zawng sawm khawmin knockout stage hi kan khel ang.” tiin Luis Suarez chuan Diario AS a hrilh.
First leg hi February ni 23 ah Wanda Metropolitano Stadium ah khelh a ni dawn a. Second leg hi March ni 15 khian Old Trafford ah khelh a ni ang, kar thum hnuah tihna a nih chu.
Atletico Madrid leh Manchester United game khelh hi hmuhnawm ber tura ngaih a ni.
Source SK