Paris Saint Germain in an forward Kylian Mbappe hralhchhuah an tum tâkah chuan French forward duhtu club lian tak tak an kat nuk a, Mbappe chungchangah Paris Saint Germain in call an dawng chho mawlh mawlh mai.
Sky Sports tarlan danin Mbappe chungchang zawt fiah tur hian club panga aia tam in PSG an be pawp tawh a, chung zingah chuan Saudi leh Premier League lam pawh an tel. Tin, Real Madrid chuan Mbappe chungchangah PSG an biak pawh thuai a rinawm bawk.
Mbappe chungchang PSG zawt fiahtute hi an hming hmera tarlan nilo mahse Saudi lam atangin Al Hilal, Al Ittihad leh Al Ahli te bakah Premier League club Arsenal, Chelsea, Newcastle leh Real Madrid elpui leh hmelma ni bawk Spanish club ropui Barcelona te an nih thu report chuan a tarlang.
Darkar tlemtê liamta mai khan Saudi club Al Hilai chuan Kylian Mbappe man tura an bid hmasa ber €300 million chu Paris Saint Germain hnena an theh luh thu Fabrizio Romano chuan a tarlang a, mimal thilah erawh PSG leh Mbappe te eng inbiakna an la nei lo thung.
European club te aiin Saudi lamin Mbappe hi an ngam huai zawk tih a chiang a, amaherawhchu a player berin Middle East lama insuan tumna a neih loh chuan eng ang pawhin offer rawn chhawpchhuak tha mahse kal turin an innawr lui thei ngawt lo.
Premier League club lian nena sawizawm annih karah Real Madrid chu Mbappe kalna tur âwm ber a ni mêk a, Los Blancos lam pawhin France captain hi mumal taka an dawr thuai a rinawm.
Kum 24 a upa forward hi PSG chuan 2017 khan Monaco atangin add ons nen €180 million sêngin an lalut a, an lâkluhna man sum thahnem tak kha kumina an hralhna man atang neih kir leh ngei an tum.
Mbappe transfer boruak a ngaihnawm chho zel a, PSG lam sum phut zat hi nakkumah a thlawna Mbappe lâkluh lo rilrûk tawh Real Madrid in an theh chhuak duh kher ang em? Nge Mbappe hian sum tam ber na Saudi lam a pan dawn? Nge ni a French forward hi khawvela league harsa ber Premier League ah kan hmu dawn? Nge ni a PSG ah season tluana bench luahlum a thlang? Hun leh ni han liam hret hret se, Mbappe hma hun tur pawh a chiang chho zel mai ang.