Champions League atanga Barcelona an tlak hnu lawk khan Barcelona defender Clement Lenglet leh Robert Lewandowski nui lai leh hlim lai thlalak chu Social media lamah a darh chiam mai, Barcelona fans te an lungawi vak lo niin a lang, Lenglet’an a insawifiah.
Bayern Munich in FC Barcelona 3-0 laia an hneh tum khan Clement Lenglet pawh hi a start ve. Tun season khelh mekah FC Barcelona lam hi an che tha lo em em a, Champions League group stage-ah pathumna dinhmun an hauhva, an group bikah German champion Bayern Munich leh Benfica ten knock out round an lut ta a ni.
Nizan inkhelhah khan Bayern Munich lamin goal 3 lai maiin hnehna chang zawk mahse, Robert Lewandowski chuan goal a khung lo a ni. Goal khung lo mahse, Lenglet nena an thlalak, hlim taka an awm lai chu social media lamah a lar hle.
Hun tawp rual khan Frenchman Clement Lenglet leh Poland Striker Lewandowski nui lai leh an infiam lai vel chu thla an lo la fuh a, hei hi Barcelona fans ten an ti thei vak lo a niang, Clement pawh a insawifiah a ngaih phah ta a ni.
Clement chuan Instagram lamah ti hian a post, “Fans zawng zawng te hnenah he thu hi ka thawn duh che u. A hmasa berah chuan nimin result avang khan ka lungngai tak zet, he club chauh hian ropui ber nih a phu a, mahse, kan ti hlawhtling theilo.” tiin Clement Lenglet chuan a lungngaih thu a post.
“A pahnihnaah chuan, kha tia result duhawm lo tak kan hlawh chuah laia Lewandowski nena kan nui lai thlalak chungchang kha ka sawifiah duh,”
“Reaction tamtak ka chhiar a, Barcelona result duhawm lo tak avang khan nangmahah nghawng a neilo em ni tih te a ni nuk mai.”
“Barcelona ka hmangaihna te, ka intiamna te leh ka theihna zawng zawng ka hlanna te hi min hriat sak ve ru, a bik takin fans te tan.”
“Vawiinah hian kan lungngai hlawm hle, mahse, hmabak tamtak kan nei la nei rih, Barcelona hian thil tamtak a phu a, chu chu a hmu let leh ang.” tiin Lenglet chuan sawi.
Source SB