Arsenal manager Mikel Arteta chuan Manchester City level phak chu an thil tum anih thu leh pha tura hma lam an pek mek thu a sawi.
Arsenal leh Manchester City te hi point 3 in an inthlau mek a, City hian game khatin an khel tam zawk bawk. February ni 16 zinglam dar 1:00 ah league hmahruaitu Gunners in an khelmual Emirates Stadium ah champion lai Manchester City an lo mikhual dawn a, inkhel pawimawh leh hmuhnawm tak a ni ngei dawn.
Gunners boss Mikel Arteta chuan an game leh ah an hmachhawn tur City chungchang hetiang hian a sawi,” Tun hnai kum 6 liamta chhunga City thiltih hi a ropui hle a, inkhel mualah an tha tawk tih an tilang fo. An game khelhdan te, a tawp an khar dan te leh harsatna an paltlang dan zp zai te hian team tha an nih zia a pholang.”
“Kan tana chona chu anni (City) level phak hi a ni a, he chona hian keimahni ah phurna a thlen ngei ka beisei. An level phak hi kan duh a, chu dinhmun thleng tur chuan hma lam kan pan mek zel” a ti.
Arsenal hian league game 21 an khelh atangin point 51 an hlawhchhuak tawh a, table chung ber luah mek zel in 2004 hnua league title chawi turin tan an la nasa hle. Amaherawhchu tun hnaia an game in beisei a pha lova, an game hnuhnung pathum ah vawikhat mah hnehna an chang lo!
Tun dinhmunah Arsenal tan City hmachhawn chu a phurawm fahran lo maithei a, amaherawhchu an khelmual ah fans te nen an tan ho dawn avangin result tha an hlawhchhuak anih pawhin thil awm lo a ni lovang.
City manager Pep Guardiola chuan tun season a league goal 25 khung tawh an striker Erling Haaland an Arsenal an hmachhawn dawn em tih a sawi chiang thei lova, Gunners tan chuan thu lawmawm a ni.