Manchester City leh RB Leipzig te chuan UEFA Champions League Round of 16 second leg khel in Etihad Stadium ah an insu a, mual neitu lam hian 7-0 a hnehna changin a belhkhawm (aggregate) ah 8-1 a ni a, Pep a nau te’n phû takin quarter final an inhlangkai.
He match ah hian Erling Haaland chuan goal nga lawih a khung a, Ilkay Gundogan leh Kevin De Bruyne te’n goal khat ve ve an thawh ve bawk.
Haaland hian season kal mêk ah City tan game 35 a inlan atangin goal 39 lawih a khung tawh a, season khata Cityzens tana goal khung tam ber record Tommy Johnson (38 goals) lo siam tawh chu a thaichhe chiah.
Haaland chu Champions League a goal 30 khung tling tura match mamawh tlem ber (25 matches) anih bakah goal 30 khung tling thei naupang ber (22 yrs, 236 days) a ni bawk a, record thar pahnih niin a tana zan chhinchhiahtlak a ni.
Norwegian striker hian season kal mêk ah Cityzens tan match 5 ah hattrick a siam dêr tawh a, 2016-17 season a Harry Kane hnua Premier League player season khata hattrick vawi nga siam leh thei hmasa ber a ni bawk.
RB Leipzig laka goal nga khungtu Haaland hi Champions League match khata goal nga khung thei pathumna a ni chiah bawk a, a hma lam in Luiz Adriano (2014 vs Shakhtar) leh Lionel Messi (2012 vs Bayer Leverkusen) te’n match khat ah goal nga an lo khung tawh a ni.
Manchester City chuan UCL match a an chak nasat tum ber record an nihrual a, 2019 khan Schalke chu 7-0 laiin an lo sawp tawh.
Inkhel dangah Porto leh Inter Milan te chu 2nd leg match ah goal awm lovin an inhnehtawk a, first leg ah Inter hi 1-0 a an lo chak tawh avangin aggregate ah pawh 1-0 tho niin Italian club hian kum 12 hnuah UCL quarter final an inhlangkai ve leh ta chiah bawk a ni.