City legend Aguero an striker piang tawh zinga tha a tih ber pathum a sawi

Manchester City legend Kun Aguero chuan striker piang tawh zinga tha a tih ber pathum a thlang a, an tha the thaw hlawm khawp mai!

2011 khan City chuan Aguero hi Atletico Madrid atangin £35 million in an sign a, Argentine international hlui hi City tana goal khung tam ber niin 2011/12 season a QPR laka Premier League title hlawhchhuahna goal a khung phei kha chu Premier League history a goal chhinchhiahtlak ber te zinga mi a ni ngei e.

Aguero hian Cityzens tana kum 10 a khelh chhungin game 390 lai a khel a, goal 260 lawih khungin Premier League title 5 a chawi bakah, FA Cup, League Cup leh Community Shield te a chawi nual bawk.

Tun hnai mai khan Twitch channel kaltlanga zawhna leh chhanna hun an hmanna ah Aguero hi striker tha zual a tih pathum thlang tura tih a ni a, hetiang hian a chhang, “History a ka top 3 striker maw? Ronaldo Nazario, Thierry Henry leh Luis Suarez te anni. Kan sawi anga indawt khian aw” tiin.

Ni e, Brazilian Ronaldo kha mi tam takin a striker ropui bera an ngaih a ni a, a career ah European club lian thenkhat Barcelona, Inter Milan, Real Madrid leh AC Milan tan te khel in club leh ram tana game 518 a inlan atangin goal 352 a khung.

Frenchman Thierry Henry hi Premier League history a player tha ber te zinga mi a ni chiang a, 2003-04 season a Arsenal in hnehloh tawng lova season an hman tliuan tumin Gunners player pawimawh ber te zinga mi a ni bawk. French legend hian Gunners tan game 377 a inlan atangin goal 228 a khung a, Emirates Stadium kawtah a lim pawh din a ni nghe nghe.

Aguero duhthlan pathumna Luis Suarez nep loh zia kan hre bawk âwm e. Kum 36 a upa hi Brazilian league ah Gremio tan a khel mek a, hliam in a tlakbuak ngun avangin inkhelh a chawlhsan hnai nia sawi a ni.

Uruguay international hi Ajax ah ropui taka a chet hnuin Liverpool a zawm a, Anfield ah fans te lawm a hlawh in 2011-2014 inkar khan Reds tan game 133 a inlan atangin goal 82 a khung. Liverpool zawh hian Barcelona leh Atletico Madrid te a zawm leh a, he hmunah hian league title a chawi ve ve bawk.

Suarez hian a career ah ram leh club tan game 775 a inlan atangin goal 476 a khung a, striker ropui ber te zinga mi a ni chiang e.

A tawp berah chuan City legend Aguero ngaihdan khi in tawmpui em? Aguero hian striker tha tak tak Zlatan Ibrahimovic, Samuel Eto’o, Robert Lewandowski, Karim Benzema bakah sawi hmaih theihloh Cristiano Ronaldo a telh lova, eng nge kan ngaihdan le?