City ka zawm hman tep – Kounde

Barcelona defender Jules Kounde chuan kum hnih liamta a Pep Guardiola nen inbiakna an neih hnua Manchester City a zawm hman tep thu a sawichhuak.

French international hian transfer bazar hnuhnung ber khan Chelsea pawh a lo zawm hman tep tawh a, Sevilla leh Chelsea te’n player transfer chungchangah inbiakna nei fel tawh mahse Chelsea lam in an innghahtir mek laiin Barcelona an lo lang a, French defender hian €55 million in Camp Nou a pan ta zawk a ni.

City chuan 2020 khan kum 23 a upa Kounde hi lakluh an lo tum ngei tawh a, manager Pep pawh in phone call hmangin a be nghe nghe. Mahse transfer chungchangah club pahnih te an inrem fel thei chiah lo niin a lang a, Benfica lam atangin Ruben Dias an lalut ta zawk a ni.

El Pais in an kawmna ah ‘Pep Guardiola an lakluh a tum tawh che tih thawm kha thudik a ni em?’ tia an zawhna Kounde chuan chhangin,”Aw, Sevilla a ka kum khatna kumah. Min lo bia a, a thu min hrilh chu min duh thu leh a team khelhdan style a ka that tur thu a ni” a ti.

Kounde chuan tuna a manager ni mek Xavi leh Pep Guardiola style chu in ang tak anih thu a sawi tel bawk.

Related Posts

error: Content is protected !!