Manchester City chuan Paris Saint Germain atanga Bernardo Silva lei dilna hmasa ber chu an hnawl niin report chuan a tarlang.
Daily Record chuan City in Bernardo Silva man tura PSG lam bid theh luh hmasak ber an hnawl tih a tarlang a, a player berin erawh Ligue 1 champion hi zawm a hreh lo nia sawi a ni thung.
Portuguese forward hi Barcelona bakah Saudi club te pawhin an ngaihven mek a, amaherawhchu tun dinhmunah PSG chu Bernardo Silva lungdumtu ber anni.
PSG football advisor Luis Campos leh Bernardo Silva te hi an inhmelhriat tha hle a, 2014 a Bernardo Silva an Monaco a zawm theih chhanah Campos hi a inrawlhthuk hle nghe nghe.
City lam chuan an player pawimawh hian contract thar ziak ngei se tih an duh a, Silva hian Etihad Stadium ah kum 2025 thleng contract a la nei bawk. Hetih mek lai hian City chuan an forward club a season hnih dang contract la neitu hi an hralhchhuak dawn rau rau anih chuan tlawm taka chhuahtir an tum lo bur a, nikuma Barca hnena an lo phut zat £70 million tho kuminah pawh hian an phut nia sawi a ni.
Kum 28 a upa Portuguese international hi season hmasaa City an treble theih chhanah a thawhhlawk hle a, inelna hrang hranga game 54 a inlan atangin goal 7 leh assist vawi 6 a thawkchhuak.
UEFA Champions League knockout round a Bayern Munich leh Real Madrid te an hmachhawn tumin an khel pan pan hle a, team pahnihte lakah hian goal hnih ve ve khungin a team chu final a luhpui anih kha.
Treble winner City hian kumin pre season ah game 4 bak an khel dawn lova, amaherawhchu club hrawl tak pahnih Bayern Munich leh Atletico Madrid te chu an hmachhawn tur zinga mi anni.