Manchester City chuan Erling Haaland penalty goal khat hmangin Crystal Palace chu Selhurst Park ah an hneh a, point 3 hlu tak an hlawhchhuak.
Palace hian an game hnuhnung 11 ah chakni hmel an hmu lova (Draw 5; Loss 6), City lakah an inveng tluan teuh hle. Chutihlaiin City lam erawh a zawnin Premier League game thum ah hnehna an chang tawh a, Arsenal nen point 2 bak in an inthlau lo.
Gunners hian naktuk zanah Fulham an hmachhawn dawn a, City nen an inkar tizau leh turin Craven Cottage ah point 3 an hmuh a tul dawn.
Manager Pep Guardiola chuan Palace lakah a player tha pahnih Kevin De Bruyne leh Kyle Walker te chu match a start tir lova, hun tawp hnaih lamah erawh a luhtir thung.
First half chhungin City lamin goal khung theihna hun tha an nei nual a, Rodri volley chu Guaita an a save a, Grealish pawh shot pawh goal pawna a kal. Tin, Ake ball cross chu Haaland an goal bar chungah a pet bawk.
2nd half a Phil Foden free-kick pet chu Guaita an a dang a, substitution bench atanga dah luh Alvarez pawhin tha zeta ball a inherpui hnuah goal lamah pet mahse a over hlauh.
Palace in hun tawp thleng City an chelh thei dawn em tia a lan laiin Michael Olise chuan Ilkay Gundogan chu penalty box chhungah a titlu hlauh pek a, City lamin penalty hmu in Haaland chuan goal ah a chantir. He goal hi minute 78 naa lut niin Norwegian striker hian season kal mêk ah league goal 28 a khung ta!
City in pakhatna a awm Gunners an hnaih zel a, team pahnihte inkarah point 2 bak a tla lo. Arsenal hi City aia game khata khel tlem anni a, naktuk zana Fulham an hmachhawn hunah hnehna chan ngei an tum ang.