Manchester City chuan an defender kumin nipui bazara chhuak tura ngaih Aymeric Laporte manah €30 million an duh a, chutihrualin hei aia chhiar hniam hret thei an la ni bawk.
European champion hian RB Leipzig atangin Croatian defender Josko Gvardiol chu €112 million vel in an sign dawn a, mimal inremna pawh nei fel tawh in Gvardiol hian Etihad Stadium lam a pan thuai ang. Kum 21 a upa defender hi khawvela defender man to ber tur a ni dawn a, 2018 a Man Utd in €93 million a Harry Maguire an sign na man a khum va va dawn a ni.
Defender thangduang ber te zinga mi Gvardiol an City a zawm dawn tak si ah chuan Pep Guardiola an Aymeric Laporte tan chhuahna kawng a hawnsak a ni. Spanish international manah hian Cityzens chuan €30 million vel an chhiar a, an indawr dan a zirin hei aia la tihniam leh hret thei anni bawk niin Sky Sports chuan a tarlang.
Laporte hian Cityzens tan Premier League 5 lai mai a chawi tawh a, season hmasa khan UEFA Champions League chawi leh bawk in tun hnai kuma City hlawhtlin theihnan a thawhhlawk hle. Centre back leh left back a chhawr kawp theih defender hi Juventus bakah Premier League club lian pahnih Arsenal leh Tottenham Hotspur te nena sawizawm mek anni bawk.
Season hmasa ah City chu treble champion niin ropui takin season an hmang a, Laporte tan erawh mimal taka season a hman that tum a ni lem lo thunge. Kum 29 a upa hian season hmasa khan a team tan inelna hrang hrangah game 24 chauh a inlan a, Pep Guardiola defender rinrawl zingah a tel lo.