Jamie Carragher chuan Erling Haaland an Manchester City a zawm avanga a tihsual thu a sawichhuak.
Norway striker hian tun season ah City tan league goal 25 lai khung tawh mahse nizana Spurs an hnehloh tumin team mamawh chhanna a ni thei lova, shots vawi khat mah nei lo in 2020 September thla hnua game khata shots a neihloh awmchhun a ni nghe nghe.
Reds legend Carragher chuan City khelhdan phung chu Haaland tana a that tawk loh thu hetiang hian a sawi,” A game hmasa bera West Ham laka a goal khung kha mitthla ila, hmun awl awm ah chak taka tlan in a khung, amaherawhchu City khelhdan phung avangin khatiang kha hmuh tur a tam lo. Counter attack an uar em em na league (Bundesliga) atangin a rawn kal a, chak tak taka a tlan lai kan hmu fo thin. Hetah erawh chutiang thil chu kan hmu tawh mang lo. Amah-a a tha ber phochhuahna tur club a thlang sual niin a lang.”
”Haaland theihna tak tak kan hmu lova, City hian season hmasa khan tuna an goal khung zah hi an khung tawh. Haaland atangin goal 25 kan hmu tawh a, amaherawhchu season hmasa khan City hian tuna City team goal khung zah hi an khung tling tho.”
“Season hmasa aiin tun season ah goal an chhuah tam zawk a, counter attack hmanga beihlet an nuam em em bawk. City a Haaland a tel hian team danglam leh nêm zawk anni. A thiamlohna pakhat mah a awm lova, City hian counter attack football an khelh loh vang mai a ni” a ti.
Haaland hian Spurs mai bakah Chelsea, Southampton, Manchester United leh Arsenal te an hmachhawn tumin goal a khung lo bawk. An game leh ah City in Astobn Villa an hmachhawn dawn a, goal nena lo kir ngei a tum ang.
