Manchester City chuan RB Leipzig centre back Josko Gvardiol transfer tihfel thuai an duh. Kum 21 a upa hi kumin nipui bazara Manchester City top target a ni mek a, khawvela defender man to ber record pawh a siam ngei in a rinawm.
Croatian international hian mimal thilah Manchester City chu inremna a neihpui tawh a, Leipzig defender hian European champion Man City chu zawm a hreh lo nasa.
Leipzig chuan Gvardiol manah hian £85 million + add ons an chhiar a, heihi City lamin an petla anih chuan Gvardiol hian 2019 a Manchester United in £80 million a Harry Maguire an sign na man kha khumin khawvela defender man to ber record thar a siam ang.
Tin, Gvardiol hi Manchester City player lakluh to ber pahnihna a ni dawn a, 2021 a City in Aston Villa atanga £100 million meuh a Jack Grealish an sign na man kha a khum loh tur awmchhun a ni.
City chuan Gvardiol transfer hi tihfel thuai an duh a, team pahnihte hi player manah inrem tawh in player man pektlak dan tur chu an sawi fel tur awmchhun a ni ta. Asia a pre season tour an tan hma in Cityzens hian Gvardiol hi sign fel ngei an duh a, Pep-a team hian July ni 23 ah an pre season game hmasa ber atan Yokohoma F.Marinos an hmachhawn ang.
Leipzig lam pawhin Gvardiol an chan ngei dawn tih an hriat hnuin a thlaktu tur defender an dawr tan a, Dutch defender Lutsharel Geetruida chungchangah Feyenoord chu inbiakna an neihpui tawh.
Kum 22 a upa manah hian Feyenoord chuan £20 million vel an chhiar nia report a ni a, Geetruida man tura Leipzig lam offer chu Feyenoord hian tum hnih lai mai an lo hnawl tawh. Leipzig hian Geetruida hi mimal thilah inremna an neihpui tawh nia sawi a ni a, an chhiarna man pektlak chiah an hmabak.